La programación incluye una esposición centrada na obra gráfica del artista xixonés, la presentación d’un documental y un llibru sobre la so trayectoria, y la celebración d’un conciertu homenaxe

El maestru avilesín Daniel Sánchez Velasco va dirixir a la OSPA na estrena del so Concierto para violín y orquesta

La 43 Selmana de les Lletres Asturianes, que va celebrase ente’l 3 y el 6 de mayu, va homenaxar al músicu y dibuxante de cómic Ígor Medio, que cumpliría 50 años nesti 2022. La programación incluye una esposición centrada na obra gráfica del artista xixonés, la presentación d’un documental y un llibru sobre la so trayectoria, y la celebración d’un  gran conciertu-homenaxe. Va ser la primer vez qu’una persona nacida na década de los setenta del sieglu pasáu reciba l’homenaxe de les Lletres Asturianes.

La presentación del llibru conmemorativu Ígor Medio. El carbón y l’arena va abrir los actos de la programación. La publicación, editada pola Conseyería de Cultura, Política Llingüística y Turismu pa la ocasión, axunta nueve artículos qu’analicen l’heriedu d’esti creador y incluye bien de testimonios gráficos de la so vida y obra. Amás, el Muséu Barjola va acoyer dende’l 3 de mayu la esposición Xente llano de Xixón. La obra gráfica d’Ígor Medio.

Ruma Barbero, cofundador xunto a Ígor Medio del grupu Felpeyu, y Norman Fernández Tascón, autor de delles monografíes y artículos sobre’l cómic, collaboraron cola Dirección Xeneral de Política Llingüística nel diseñu del programa d’actividaes. La proyección del documental Onde soi quien quiero ser. Una semblanza d’Ígor Medio y la celebración d’un gran conciertu-homenaxe onde van participar más de dos decenes de músicos y bandes asturianes completen l’homenaxe que la 43 Selmana de les Lletres rinde a Ígor Medio.

El programa d’actos incluye amás la celebración d’un conciertu de la Orquesta Sinfónica del Principáu d’Asturies, que cola batuta del maestru avilesín Daniel Sánchez Velasco va estrenar el so Concierto para violín y orquesta nel Auditoriu Príncipe Felipe d’Uviéu.

Por cuenta de la 43 Selmana de les Lletres Asturianes, la Conseyería de Cultura, Política Llingüística y Turismu edita tamién el llibru Contos eonaviegos, una escoyeta de 28 rellatos d’otros tantos autores publicada pa la ocasión. Estos Contos eonaviegos pal estremu occidental d’Asturies y el yá mentáu Ígor Medio. El carbón y l’arena pal restu de la comunidá son les obres que se van poner gratuitamente a disposición de les persones que merquen un llibru o un discu n’asturianu o n’eonaviegu el vienres 6 de mayu, Día de les Lletres Asturianes. Un total de 57 llibreríes y tiendes de discos del Principáu d’Asturies collaboren anguaño cola Dirección Xeneral de Política Llingüística na promoción y celebración de les Lletres.

La Selmana de les Lletres Asturianes, homenaxe públicu y institucional a la creación lliteraria en llingua asturiana, celébrase cada mes de mayu dende 1980 y foi configurándose como un acontecimientu cultural de gran importancia y vitalidá. Trátase d’un eventu participativu onde se dan la mano lo lliterario, lo festivo y lo institucional. A esta celebración entamada pol Gobiernu d’Asturies axúntense múltiples instituciones y participen de manera especial centros educativos, llibreríes, editoriales, escritores y medios de comunicación.

Reseña biográfica d’Ígor Medio

El dibuxante, guionista de cómic y músicu Ígor Medio (1972-2006) realizó cola so estensa obra una contribución esencial al cómic n’Asturies, creando mundos qu’inda perviven nel imaxinariu colectivu, ente los que destaca la familia Castañón, protagonista d’una tira cómica que se publicó ente 1997 y 2005 nel suplementu de branu del diariu La Nueva España.

Collaborador en fanzinos y revistes como El Llapiceru, El Wendigo o Esquit y corresponsable de cómics de sonadía como Love Gun, en 1991 Ígor Medio fundó xunto al percusionista y compañeru d’estudios Ruma Barbero’l grupu de folk Felpeyu, que col tiempu diba convertise nun referente de la música asturiana. L’artista xixonés desenvolvió tamién un trabayu intensu como productor de discos d’artistes y grupos asturianos como Flavio Rodríguez, Gatos del Fornu o Tejedor. Nel 2003 punxo en marcha’l sellu editorial Tierra, nel que diba apaecer el so llibru recopilatoriu de la familia Castañón, Too Castañón. Ígor Medio morrió nel 2006 nun accidente de carretera nel que falleció tamién Carlos Redondo, compañeru d’él en Felpeyu.

Descargar programa