La promoción de la ruta ente Llébana y Uviéu, alcordada colos 11 conceyos que traviesa, suma un atractivu nuevu a la ufierta cultural y turística

El programa d’actividaes del aniversariu, que va desenvolvese hasta últimos d’añu, incluye seis esposiciones, conciertos, alcuentros científicos y la edición de publicaciones especializaes

 “Diseñemos una programación ambiciosa, asitiada nuna visión rigorosa de lo que supunxo’l fechu históricu y la repercusión tan grande que tuvo”, destaca la conseyera Berta Piñán

26/05/2022.- La Conseyería de Cultura, Política Llingüística y Turismu va inaugurar el Camín de los Santuarios, la ruta nueva que xunta Llébana y Uviéu, pola mor de la conmemoración de los 1.300 años de la batalla de Cuadonga.

“L’apertura del Camín de los Santuarios representa un atractivu cultural y turísticu nuevu pa tola zona y una de les exes vertebradores de la programación del aniversariu”, destacó la titular de Cultura, Berta Piñán, na presentación del programa d’actividaes, frutu del trabayu conxuntu que se fixo estos meses colos Conceyos. Piñán tamién recordó que tán executándose los trabayos d’acondicionamientu y de meyora de la señalética a lo llargo de la ruta.

La programación de Cuadonga 2022 va incluyir actividaes nos 11 conceyos que traviesa la ruta: El Valle Altu de Peñamellera, El Valle Baju de Peñamellera, Cabrales, Onís, Cangues d’Onís, Parres, Piloña, Nava, Noreña, Siero y Uviéu. Amás, tán rematando’l diseñu d’una app multillingüe que va ufiertar información útil del percorríu, de cuasi 200 quilómetros.

Pela so parte, el Real Institutu d’Estudios Asturianos entamó un ciclu de conferencies sobre’l Camín de los Santuarios, qu’empieza mañana en Cuadonga.

Los actos incluyen, amás, seis grandes esposiciones, conciertos, alcuentros científicos, conferencies, cursos o xornaes formatives. “Queremos ufiertar al públicu asturiano y a quien nos visiten una visión rigorosa de lo que supunxo’l fechu históricu y la repercusión tan grande que tuvo a lo llargo de los sieglos. Y vamos facelo al traviés d’una programación ambiciosa y multidisciplinar”, esplicó la conseyera.

Esposiciones

El catálogu d’esposiciones ufierta delles perspectives sobre’l mesmu acontecimientu históricu. La Biblioteca d’Asturies va abrir la primera d’elles el 3 de xunu baxo’l títulu Cuadonga: una batalla historiográfica, un percorríu pelos testimonios bibliográficos que dexó la batalla y el discutiniu científicu que la arrodia. La sala Sabadell Herrero d’Uviéu va acoyer de xunu a ochobre la muestra Cuadonga al traviés del arte, una retrospectiva de la buelga artística que dexó’l finxu históricu.

Una mirada de los creadores del sieglu XXI sobre la batalla ye lo que va proponer 1300 años creando camín. Conmemoración de Cuadonga, que va axuntar en formatu mupi la interpretación de diseñadores gráficos sobre la batalla del 722 y el so heriedu. Los diseños van poder vese nos conceyos integrantes del Camín de los Santuarios a partir de xunu.

La Casa de Cultura de Cangues d’Onís va acoyer yá en xunetu la colección de semeyes que fixo a últimos del sieglu XIX nel Real Sitiu y la contorna Daniel Álvarez Fervienza. En setiembre, va ser el turnu p’averase a la interpretación que’l fotógrafu José Ferrero y los sonidistes de Mind Revolution faen del paisaxe y l’ambiente del Camín de los Santuarios en Cuadonga 2022 / Un proyectu fotográficu & sonoru.

A lo último, el Muséu Arqueolóxicu va acoyer dende ochobre Cuadonga 722-2022. Les buelgues y los rellatos, una gran retrospectiva qu’asitia’l contestu arqueolóxicu del sieglu VIII na Península Ibérica y la contorna europea al traviés de pieces d’armamentu, monedes, elementos de vistimienta o cerámica d’usu cotidianu. Alredor d’esta esposición, va celebrase un alcuentru científicu que va axuntar n’Uviéu a espertos de tol país.

Música, cursos y publicaciones

L’axenda musical va tener una primer cita en xunu en Cangues d’Onís con un recital d’Amancio Prada, que presenta un repertoriu basáu nel Cántico Espiritual de San Juan de la Cruz. N’agostu, la Orquesta Sinfónica del Principáu d’Asturies (Ospa) va ufiertar un conciertu na Basílica de Cuadonga y en setiembre va ser el coru León de Oro’l qu’actúe nel mesmu escenariu.

La ufierta d’itinerarios culturales pel patrimoniu que programa a lo llargo de tol añu la Conseyería de Cultura al traviés de la Sociedá Pública de Xestión y Promoción Turística y Cultural del Principáu, va centrase nos conceyos qu’integren el Camín de los Santuarios. Tamién el circuitu específicu creáu dientro del programa Asturies Cutura en Rede va llevar delles actividaes a estos conceyos.

La primera de les publicaciones especiales editaes pola mor de la conmemoración ye’l llibru El Reino de Asturias en el contexto europeo de los siglos VIII y IX, de César García de Castro, que se presentó esta mañana xunto a la programación d’actos pa los seis meses vinientes.

La Universidá d’Uviéu tamién se suma a la celebración al traviés de cursos d’Estensión Universitaria, qu’esti branu van ufiertar un seminariu sobre turismu relixosu. Nel aspectu formativu, tán previstos alcuentros-coloquiu con empresarios y entamadores de los conceyos allugaos nel Camín de los Santuarios pa poder abrir víes que supongan la so promoción turística y económica con un modelu sostenible.