28/06/2022.- 10 rutes pa percorrer y conocer el patrimoniu cultural y natural asturianu esti branu conformen una edición nueva del programa D’itinerarios pel Patrimoniu, un proyectu de la Conseyería de Cultura, Política Llingüística y Turismu, xestionáu pola Sociedá Pública de Xestión y Promoción Turística y Cultural del Principáu d’Asturies, que busca dende’l 2018 visibilizar y facilitar l’accesu del públicu al munchu y variáu patrimoniu presente en tola xeografía de la nuestra rexón.

La celebración de los 1.300 años de la batalla de Cuadonga, el Xacobéu y el Camín de los Santuarios garren un protagonismu especial, con percorríos que van empezar esti sábadu 2 de xunetu. Los participantes pueden visitar los monumentos que’l pelegrín atopa n’Uviéu, adientrase na cultura sidrera, percorrer Os Ozcos y facer la ruta d’A Seimeira, o pasiar pela contornada del Nora y pela Ruta Minera de Xovellanos. Tamién va haber rutes pel Camín del Salvador dende Ayer de Riba, per Arenas y El Valle Altu de Peñamellera, pel Parque Natural de Redes, per Ponga y Piloña, per Somiedu y per Cangues d’Onís, onde va visitase’l santuariu y la basílica de Cuadonga y va facese a pie parte de la Ruta de les Pelegrinaciones.

Les entraes pa participar en cada itinerariu, con places llimitaes, tienen un preciu de 18 euros o de 15 euros pa públicu infantil ente 4 y 11 años, grupos de más de 10 persones y visitantes con Pasaporte Cultural o con tarxeta del Club Cultura Principáu d’Asturies. Les localidaes pueden sacase presencialmente nes oficines de Curin Servicios Integrales de Turismo, de llunes a vienres n’Uviéu, y al traviés de la web www.hazteunbus.es. La salida y llegada de tolos itinerarios va realizase n’Uviéu y la ruta d’Os Ozcos incluye posa n’Avilés.

Percorríos

• 2 de xunetu. Uviéu nes pelegrinaciones.
• 9 de xunetu. Camín del Salvador dende Ayer de Riba.
• 16 de xunetu. Arenas y El Valle Altu de Peñamellera.
• 23 de xunetu. Parque Natural de Redes.
• 30 de xunetu. La contornada del Nora.
• 6 d’agostu. Cultura sidrera.
• 13 d’agostu. Ponga y Piloña.
• 27 d’agostu. Os Ozcos.
• 10 de setiembre. Cangues d’Onís.
• 24 de setiembre. Seronda nel Parque Natural de Somiedu.