La Conseyería de Cultura, Política Llingüística y Turismu invierte cuasi un millón d’euros nos nueve circuitos culturales que s’ufierten a tolos Conceyos asturianos

Los nueve circuitos culturales del programa Asturies, Cultura en Rede van ufiertar hasta avientu 515 actividaes per tol territoriu asturianu. La Conseyería de Cultura, Política Llingüística y Turismu fai una inversión de 959.000 euros pa financiar na segunda metá del añu una programación cultural multidisciplinar que pueda llegar a tolos conceyos.

Asturies, Cultura en Rede ufierta propuestes d’artes escéniques, música, lliteratura, cultura tradicional, artes visuales, Xacobéu, Cuadonga 2022 - Camín de los Santuarios, el ciclu Autores nel Camín y la Cinemateca Ambulante. El programa desenvuélvese en collaboración colos Conceyos asturianos y xestiónase dende la Sociedá Pública de Xestión y Promoción Turística y Cultural del Principáu d’Asturies. Les cifres d’actividaes y presupuestu de cada circuitu pal segundu semestre del añu son estes:

• Circuitu d’artes escéniques: 167 eventos de 53 compañíes en 42 conceyos, con una inversión superior a los 382.000 euros.
• Circuitu de música: 78 conciertos de 36 profesionales y empreses en 36 conceyos, con un presupuestu superior a los 185.000 euros.
• Circuitu de lliteratura: 99 eventos de 36 profesionales en 32 conceyos, a los que se destinen más de 59.000 euros.
• Circuitu de cultura tradicional: 81 eventos de 24 profesionales en 31 conceyos, con una inversión de más de 74.000 euros.
• Circuitu d’artes visuales: 11 artistes y galeríes, seleccionaos nes dos convocatories últimes, van esponer 16 muestres en 10 conceyos hasta últimos del añu. Na convocatoria d’anguaño escoyéronse 14 proyectos de 14 creadores y galeríes que van producise nel 2022 y van exhibise l’añu que vien, con un costu de más de 85.000 euros.
• Circuitu Xacobéu: 39 eventos de 25 profesionales en 19 conceyos, con una inversión d’alredor de 90.000 euros.
• Circuitu de Cuadonga 2022 - Camín de los Santuarios: doce eventos de nueve profesionales y empreses en cinco conceyos, con una inversión de más de 20.000 euros.
• Circuitu Autores nel Camín: 23 alcuentros en 18 conceyos con creadores y artistes asturianos gallardonaos colos premios lliterarios y escénicos convocaos o promovíos pola Conseyería de Cultura, Política Llingüística y Turismu. El circuitu dispón d’un presupuestu anual de 50.000 euros.

A la programación d’estos circuitos va sumase’l ciclu de cine itinerante La Cinemateca Ambulante, con programación trimestral d’ochobre a avientu y una inversión prevista de más de 14.000 euros. La programación de los circuitos pue consultase na web asturiesculturaenrede.es, onde yá ta disponible la información de les actividaes vinientes.