Cultura diseña un programa festivu ampliu con más de 30 actividaes nel que van participar más d'una docena d'artistes y agrupaciones folclóriques

El Gobiernu del Principáu recupera la programción festiva de la celebración del Día d'Asturies, qu'anguaño se desenvolverá en Corvera y qu'inclúi más de 30 actividaes cola participación d'una docena d'artistes y agrupaciones folclóriques. Asina, tán previstos conciertos, un mercáu, actividaes infantiles, una muestra del folclore rexonal y exhibiciones de xuegos y deportes tradicionales, ente otros actos que van  tener llugar en  toles parroquies del conceyu. 

El director xeneral de Cultura y Patrimoniu, Pablo León, y l'alcalde de Corvera, Iván Fernández, presentaron esta mañana la programación na que la música va ser una de les protagonistes indiscutibles.

Na xornada festiva van celebrase once conciertos, dende'l mediudía hasta la madrugada. Los Berrones, Chus Pedro y Pipo Prendes, y Anabel Santiago con Pandereteres van ser los encargaos d’amenizar la tarde y nueche del Día d'Asturies xunto col cómicu Joaquín Pajarón. Pela so parte, la Banda de Gaites de Corvera y la banda de música municipal van animar yá dende'l mediudía los escenarios festivos, onde amás va sonar la música d’Algaire, Enkasillaes, Argayu, el Tríu Guarneri, Matilde & Jonás y el Dúu Concerto.  

La cultura sidrera tamién va tener un güecu na xornada festiva cola masterclass que van impartir escanciadores nel parque d'Europa de Les Vegues. Otru de los encantos pal públicu asistente va ser la exhibición del globu aerostáticu que'l Gobiernu del Principáu contrató como soporte promocional del Paraísu Natural y que va realizar vuelos cautivos col públicu que lo quiera, previa reserva en https://cutt.ly/UXV5AAy

Los más pequeños van tener un espaciu propiu con una pista de cars nel parque de Los Campos. El deporte adaptáu tamién va tar presente na programación festiva gracies a la collaboración de la Federación de Deportes de Minusválidos Físicos (FEDEMA) col desenvolvimientu de dellos talleres.

El mercáu tradicional va poder visitase nes Vegues, onde tamién se podrá disfrutar de la exhibición de xuegos tradicionales.  El Grupu de Baille de Corvera va ser l'encargáu de mostrar la riqueza del folclore asturianu a lo llargo del día. El broche final de la xornada van ponela a media nueche los fueos artificiales.