02/02/2023.- Esti vienres 3 de marzu ábrense al públicu en Castrillón dos esposiciones feches nel marcu del circuitu d’artes visuales d’Asturies, Cultura en Rede: Corazón de Sandra Fernández Sarasola y El techo de cristal de Cécile Brillet.

Conrazón axunta dellos llibros d’artista fechos tanto de forma individual como colectiva por Fernanda Álvarez, Isabel Cuadrado, Sandra Sarasola y Elisa Torreira, una propuesta collaborativa singular que zarra una esperiencia vital y artística compartida. El techo de cristal de Cécile Brillet ye una reflexón sobre la falta d’oportunidaes de desenvolvimientu llaboral, intelectual y personal de les muyeres. La instalación ta formada por una gran estructura metálica de la que colinguen discos cerámicos, caún d’ellos con un nome de muyer, tanto de muyeres famoses inspiradores como de muyeres anónimes coles que l’artista interactuó.

Dambes muestres van poder visitase hasta’l 27 d’abril nel Valey Centru Cultural de Castrillón.

Amás, n’Avilés pueden visitase les esposiciones Austral de Dos Ajolotes Espacio de Arte, hasta’l 5 de marzu na Casa de Cultura, una muestra colectiva onde participen 10 artistes con obres de pintura, dibuxu, escultura o fotografía vinculaes con un títulu de la colección Austral d’Espasa Calpe; y Lo elevado profundo de Ros Boisier, hasta’l 17 de marzu na Factoría Cultural, una reflexón sobre la mirada al paisaxe de monte asturianu y sobre’l puntu de vista de lo que se fotografió que se va poder ver a partir del día 20 d’esti mes en Xixón.

En Xixón muéstrase actualmente Motivos para dibujar (desde la inquietud) d’Andrea Rubio hasta’l 19 de marzu, una esposición visual alredor del rexistru del movimientu al traviés de la fotografía, el dibuxu y el videu.

Nel marcu del circuitu d’artes visuales yá se programaron p’anguaño 16 esposiciones de 11 artistes y galeríes en siete conceyos, escoyíos nes dos convocatories últimes d’esti circuitu. Los costos de producción de los 14 proyectos de 14 creadores y galeríes producíos l’añu pasáu superen los 80.500 euros.

Asturies, Cultura en Rede ye un proyectu de la Conseyería de Cultura, Política Llingüística y Turismu realizáu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies nel que s’incluyen, amás del circuitu d’artes visuales, los circuitos temáticos d’artes escéniques, lliteratura, cultura tradicional, música y Autores nel Camín.

La programación ta disponible na web asturiesculturaenrede.es, onde s’actualiza tola información.