20/03/2023. El circuitu Autores nel Camín d’Asturies, Cultura en Rede promueve anguaño 64 alcuentros en 27 conceyos con creadores y artistes asturianos gallardonaos colos premios lliterarios y escénicos convocaos o promovíos pola Conseyería de Cultura, Política Llingüística y Turismu.

Pa esta selmana programáronse cinco alcuentros protagonizaos por dellos premiaos nel 2022:

• Inés Fernández, Premio Quiastolita de Lliteratura Infantil y Xuvenil en gallego-asturianu cola obra Bolo, va tar el martes 21 de marzu en Cuaña.
• Mª del Carmen Siñeriz, ganadora del Premio Ría del Eo de Poesía en gallego-asturianu con Pigureira de palabras esqueicidas, va direl 21 de marzu a Castropol y el 24 a Santalla d’Ozcos.
• Marta Mori, gallardonada col Premiu Xuan María Acebal de poesía n’asturianucon Los carreros del tiempu, va tar el 23 de marzu en Carreño.
• Carlos Alba Cellero va representar As galochas baleiras el 23 de marzu n’A Veiga, obra pola que recibió’l Premiu Nel Amaro de Teatru Profesional.

Amás d’estos premiaos, hasta últimos d’añu va haber actividaes onde van participar Gonzalo G. Barreñada (Premiu Xosefa Xovellanos de novela n’asturianu con El viaxe del cacique), Damián Barreiro (Premiu Máximo Fuertes Acevedo d’ensayu n’asturianu con Asturianía kitsch: decálogu de la cultura pop astur), Algaire (Premiu Camaretá al meyor cantar col tema «Coral y maera»), Guillermo Menéndez (Premiu Alfonso Iglesias de cómic n’asturianu con Ana María. La Llobera d’Asturies) y Blanca Fernández Quintana (Premiu María Josefa Canellada de lliteratura infantil y xuvenil n’asturianu con El cartafueyu d’alquimia).

El circuitu Autores nel Camín, financiáu dafechu pol Principáu, dispón d’un presupuestu anual de más de 51.000 euros. La programación ta disponible na web asturiesculturaenrede.es.

Asturies, Cultura en Rede ye un proyectu de la Conseyería de Cultura, Política Llingüística y Turismu fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, onde s’incluyen, amás del circuitu d’Autores nel Camín, los circuitos temáticos d’artes escéniques, lliteratura, cultura tradicional, música y artes visuales.