L’alcuentru profesional y comercial, que se va celebrar del 23 al 26 de mayu en Xixón, quier facilitar l’intercambéu ente artistes, programadores y instituciones de la comunidá

El programa va incluyir la exhibición de 12 espectáculos polo menos, amás de presentaciones y un espaciu de networking

La inversión prevista por Cultura nesti campu xube anguaño a 1,3 millones si se suma programación propia, ayudes, patrocinios y fondos pa l’anovación  d’equipamientos

27/03/2023.- El Gobiernu d’Asturies pón en marcha Escena en Rede, Muestra d′Artes Escéniques, una muestra dedicada a les artes escéniques que naz cola vocación de facilitar la comunicación, cooperación y intercambéu ente artistes, programadores y instituciones de la comunidá. Tamién aspira a dinamizar el sector, xenerar espacios pal debate y la reflexón y potenciar estilos y llinguaxes de creación nuevos. La Conseyería de Cultura, Política Llingüística y Turismu va invertir 100.000 euros na organización de la muestra.

La primer edición del alcuentru profesional y comercial va desenvolvese del 23 al 26 de mayu en Llaboral Ciudá de la Cultura, en Xixón. El programa va incluyir la exhibición de 12 espectáculos, como mínimu, en distintos espacios interiores y esteriores de Llaboral, amás de presentaciones a profesionales, un espaciu de networking y una xornada formativa profesional. Un total 37 compañíes y distribuidores asturianes inscribiéronse na convocatoria pa la selección d’obres que se van programar na muestra. Ente los espectáculos presentaos hai propuestes de teatru, títeres, circu y danza.

“La creación d’Escena en Rede ye una bona noticia coincidiendo cola celebración Día Mundial del Teatru, porque da respuesta a una de les demandes históriques del sector: cuntar con un alcuentru específicu onde programadores y públicu en xeneral puedan conocer les novedaes y los espectáculos que tán xirando. Amás, créase un espaciu que facilita la comunicación y el contactu ente los distintos axentes del sector y ocúpase tamién de la vertiente formativa de los profesionales”, destacó la conseyera de Cultura, Política Llingüística y Turismu, Berta Piñán.

Inversión de 1,3 millones pal sector nel 2023

La cifra global d’inversiones prevista nel presupuestu de Cultura en materia escénica algama anguaño los 1,3 millones, teniendo en cuenta la financiación de la programación propia, les llinies de subvenciones, l’apoyu a festivales especializaos, la participación en certámenes intercomunitarios y los fondos europeos que se van destinar a la meyora y anovación d’equipamientos culturales.

Asina, el circuitu de teatru d’ Asturies, Cultura en Rede va cuntar con una dotación de 450.000 euros. Pal primer semestre programáronse 139 espectáculos de 59 artistes, compañíes y empreses en 48 conceyos. Tamién ta prevista la creación de la Rede Teatros d’Asturies, otra de les aspiraciones vieyes del sector.

Per otra parte, Cultura va convocar dos llinies específiques d’ayudes dotaes con 100.000 y 120.000 euros p’apoyar a les empreses del sector y impulsar la producción escénica, respectivamente. Les compañíes asturianes van siguir participando nel Camín Escena Norte, el proyectu d’intercambéu cultural creáu ente Galicia, Asturies, Cantabria, Euskadi y Navarra pa fomentar l’intercambéu.

Amás, Llaboral Ciudá de la Cultura va siguir acoyendo’l programa de residencies creáu nesta llexislatura pa sofitar la creación y investigación escénica de los profesionales de la comunidá, apurriendo los recursos materiales y humanos del Teatru de la Llaboral pa la concepción, creación y puesta n’escena de la obra. Nesti primer semestre, seis compañíes asturianes van participar na iniciativa.