03/04/2023.- El Centru d’Arte Rupestre de Tito Bustillo, el Centru de Recepción y Interpretación del Prerrománicu Asturianu, el Muséu de Grandas de Salime “Pepe el Ferreiro”, el Muséu del Xurásicu d’Asturies (MUXA) y el Parque de la Prehistoria de Teberga proponen actividaes pa tolos públicos esta Selmana Santa. Estos equipamientos, dependientes de la Conseyería de Cultura, Política Llingüística y Turismu, tán xestionaos pola Sociedá Pública de Xestión y Promoción Turística y Cultural del Principáu d’Asturies.

Les entraes pa visitar los equipamientos y pa participar nes actividaes, con places limitaes, pueden adquirise al traviés de caúna de les webs de los centros.

Centru Tito Bustillo

Nel Centru d’Arte Rupestre Tito Bustillo el públicu pue visitar la muestra Prehistolego, con seis escenes tematizaes y construyíes pola Asociación Asturbrick con pieces de Lego. Hai vitrines dedicaes a los conxuntos artísticos d’El Pozu’l Ramu, una reproducción de la cueva o una escena de la rodiada del equipamientu.

Del 6 al 9 d’abril el públicu infantil de 4 a 11 años pue diseñar y personalizar chapes imitando l’arte de los nuestros antepasaos en Esta Selmana Santa vamos date la chapa a les 12:00 hores. El públicu familiar pue apuntase a los Soníos del Pasáu el 8 y 9 d’abril, a les 16:00 hores, y conocer los instrumentos musicales más vieyos y la runfadera, decorando una que va poder llevar de recuerdu.

Centru del Prerrománicu Asturianu

Nel Centru del Prerrománicu Asturianu la música del medievu va sonar el 7 d’abril, a les 12:00 hores, nel conciertu gratuitu Alzaytun: la música de las tres culturas que van ufrir Juanma Rivero y Wafir S. Gibril. Dambos van usar instrumentos históricos reproducíos fielmente y van tocar cantares recuperaos de códices y manuscritos comprendíos ente los sieglos XII al XIV.

El 8 d’abril Maite Capín va ufiertar a les 11:30 hores un taller de veles naturales, coles places yá escosaes, y el día 9 a les 12:00 hores el públicu infantil va poder conocer al traviés d’esperimentos la fruta que s’empezó a consumir más davezu na época prerrománica en Ludens Cum Acidum.

Tamién sigue abierta al públicu la esposición Ruta primitiva del Camín de Santiago al traviés del vestuariu, con ropa de pelegrín, noble, campesín o monxu que la diseñadora Maite Capín ellaboró pa la película El Crucigrama de Jacob.

Muséu de Grandas de Salime “Pepe el Ferreiro”

Arturo Iglesias, el “torneiro” del Muséu, va enseñar al públicu’l 6 y 7 d’abril el funcionamientu del tornu de media vuelta. El manexu d’esti tornu dio pie a la creación d’un oficiu con entidá propia que, depués de desaniciase, recuperóse  nel centru museísticu. Va haber pases ininterrumpíos de 11:30 a 14:00 y de 16:00 a 19:00 hores.

Tamién sigue abierta la esposición fotográfica Nía. Nosoutras ideamos arte, un percorríu pelos saberes, xeres y conocimientos de les muyeres del mundu rural al traviés de testimonios gráficos apurríos poles sos protagonistes. Nel marcu d’esta muestra, el 6 d’abril a les 12:00 hores va haber una visita-taller pa públicu infantil de 7 a 12 años, onde los participantes van dibuxar a les mas, güeles o vecines faciendo les xeres cotidianes pa visibilizar y poner en valor el trabayu de curiaos pal desenvolvimientu de la vida.

Muséu del Xurásicu d’Asturies

El público familiar va poder aprender qué comíen los dinosaurios faciendo huches tematizaes y distintos xuegos en Dinosaurios fartones, un taller con Blue Shape que se va facer del 5 al 9 d’abril, con dellos pases cada día.

Nel MUXA los visitantes tamién pueden disfrutar d’una de les muestres más completes y didáctiques del mundu sobre dinosaurios y pasiar pel Xardín ente pieces orixinales del Xurásicu y les reproducciones de dalgunos de los reptiles más representativos de la Era del Mesozoicu, incluyendo’l Liliensternus, Eoraptor y Buriolestes incorporaos hai poco a la zona museística del esterior.

Parque de la Prehistoria de Teberga

Nel Parque va haber actividaes pa tolos públicos del 6 al 9 d’abril: a les 13:00 hores, Arte fósil, onde se crea y se da color a los fósiles que los participantes van poder llevar pa casa; y a les 17:00 hores, Ferramientes de caza, un taller onde va ellaborase un arcu, unes fleches y un carcax con materiales reciclaos o naturales.

El públicu que s’avere al Parque de la Prehistoria de Teberga tamién pue visitar la Galería, el espaciu museísticu del centru; la Cueva de Cuevas, coles reproducciones a escala real de la Sala de los Polícromos de la Cueva de Tito Bustillo, el panel n.^u 4 del Salón Negru de la Cueva de Niaux y el Camarín de la Cueva de Candamu; o pasiar per fuera y observar a los bisontes europeos, caballos Przewalski y tarpanes, uros de Heck, gamos y venaos que yá pintaben los nuestros antepasaos.