Los circuitos d’Asturies Cultura en Rede destaquen con 118 actos d’artes escéniques, lliteratura, música, cultura tradicional y los alcuentros d’Autores nel Camín

09/04/2023.- La rede d’equipamientos xestionaos pola Conseyería de Cultura, Política Llingüística y Turismu programó esti mes 250 actividaes per tola xeografía asturiana. La ufierta incluye alternatives pa toles edaes, bona parte d’elles de baldre.

Música, teatru, cine, esposiciones, talleres divulgativos o itinerarios patrimoniales son dalgunes de les propuestes. La celebración del Día del Llibru, el 23 d’abril, va tener relevancia nel programa con propuestes como conferencies o alcuentros lliterarios, ente otres más.

La ufierta impulsada dende los equipamientos públicos abarca cuasimente tol territoriu. Asina, los circuitos del programa Asturies Cultura en Rede tienen programaes un total de 118 actividaes d’artes escéniques, lliteratura, música, cultura tradicional y los alcuentros d’Autores nel Camín.

El Muséu del Xurásicu d’Asturies, el Centru del Prerrománicu, el Parque Prehistóricu de Teberga, el Centru d’Arte Rupestre de Tito Bustillo y el Muséu Etnográficu de Grandas de Salime ellaboraron un programa de 28 actividaes nes que la divulgación y les iniciatives pa los más pequeños garren protagonismu.

Ente les actividaes de Llaboral Centru d’Arte van incluyise esposiciones y media docena d’acciones que van dende los talleres infantiles a les conferencies y xornaes de puertes abiertes. El Centru Niemeyer d’Avilés va celebrar una edición nueva del Festival de Cine LGTBI, teatru y música, amás de les esposiciones temporales dedicaes a Salvador Dalí y Gerardo Vielba.

La Orquesta Sinfónica del Principáu d’Asturies recupera’l so programa OSPA de cerca p’averar la música clásica a dellos llugares. D’esta vuelta, del 11 al 14 d’abril va visitar La Felguera, La Pola Siero, Avilés y Ḷḷuarca. Col so director titular y artísticu nuevu, Nuno Coelho, la OSPA va interpretar una selección del propiu maestru de Les Indies galantes, ópera ballet del compositor Jean-Philippe Rameau, amás d’una de les obres más famoses del repertoriu sinfónicu, la Quinta Sinfonía de Beethoven.

El Muséu de Belles artes va ufiertar la so programación didáctica pa públicu infantil y adulto, acompañada de conferencies y visites guiaes. Tamién va poder visitase nel Muséu Arqueolóxicu d’Asturies hasta’l día 9 la esposición temporal Cuadonga. Les buelgues y los rellatos, dientro de los actos de conmemoración de los 1.300 años de la batalla.

La Biblioteca d’Asturies y la Biblioteca Xovellanos caltienen la so ufierta de cuntacuentos y actividaes infantiles y los alcuentros lliterarios y talleres destinaos a los adultos. Dambos centros tán diseñando una programación específica pa conmemorar el Día del Llibru.