15/05/2023.- El Centru d’Arte Rupestre de Tito Bustillo, el Centru de Recepción y Interpretación del Prerrománicu Asturianu, el Muséu Etnográficu de Grandas de Salime “Pepe el Ferreiro”, el Muséu del Xurásicu d’Asturies (MUXA) y el Parque de la Prehistoria de Teberga celebren el Día Internacional de los Museos con actividaes y visites especiales el 20 y 21 de mayu. Estos equipamientos, dependientes de la Conseyería de Cultura, Política Llingüística y Turismu, tán xestionaos pola Sociedá Pública de Xestión y Promoción Turística y Cultural del Principáu d’Asturias.

Pue consultase’l detalle de tola programación pa la fin de selmana nes webs respectives. Amás, el 18 de mayu la entrada a toos estos centros va ser de baldre.

Centru d’Arte Rupestre de Tito Bustillo

El Centru ufre la fin de selmana un taller familiar de baldre centráu na sostenibilidá na Prehistoria. En Pasado sostenible: recolección creativa los participantes van conocer cómo los nuestros antepasaos aprovechaben los recursos naturales pa que-yos sirva darréu d’inspiración pa fabricar un marcapáxines que van llevar pa casa. El taller, con places limitaes, va facese’l 20 y 21 de mayu, a les 12:00 y 16:00 hores, y pueden retirase primero les invitaciones na web centrotitobustillo.com. 

Centru del Prerrománicu Asturianu

El 20 de mayu, a les 17:00 hores, el públicu infantil de 5 a 12 años va poder construyir con pieces d’espluma monumentos del Prerrománicu Asturianu. En Pilpayu Medieval. ¡Construyendo a lo grande! van descubrir les característiques d’esta arquitectura y los sos los procesos y técniques constructives. Pa participar, pueden retirase primero les invitaciones na web centroprerromanicoasturiano.com.

El 21 de mayu, n’horariu d’apertura del Centru, el públicu infantil y familiar va poder facer manualidades y construcciones de dalgún de los elementos del Prerrománicu Asturianu de manera llibre o xugar col Alquerque o Latrunculi, precursores de los xuegos de mesa modernos.

Muséu Etnográficu de Grandas de Salime “Pepe el Ferreiro”

El 20 y 21 de mayu esti muséu ufre talleres demostrativos de tornería y forxa y una visita pa conocerLo que el Museo esconde.

Arturo Iglesias, el torneiro del Muséu, va mostrar  el 20 de mayu’l funcionamientu del tornu de media vuelta y la tresformación de la madera en recipientes d’usu domésticu, n’horariu de 11:30 a 14:00 y de 16:00 a 19:00 hores, en pases de 20 minutos. El 21 de mayu va encendese la fragua del Muséu de 11:30 a 14:30 hores, pa conocer l’oficiu del ferreiro. Amás habrá demostraciones en vivo de la construcción d’un clavu, en pases de 20 minutos, nes que’l públicu va conocer les ferramientes, producciones y los elementos que yeren indispensables nel taller del ferreiro. Estes demostraciones d’oficios tradicionales nun tienen costu adicional cola entrada al Muséu.

Amás de percorrer la esposición permanente, los visitantes van poder entrar  n’espacios en xeneral pesllaos al públicu como los talleres y almacenes y descubrir los llabores internos de la institución y cómo mos llegaron les pieces espuestes que vemos en Lo que el Museo esconde, que va celebrase’l 20 y 21 de mayu a les 12:00 hores. Pa esta visita, con places limitaes, pueden retirase primero les entraes na web museodegrandas.es.

Muséu del Xurásicu d’Asturias

El 20 y 21 de mayu’l públicu familiar va poder participar nel MUJA nel taller Piedra, papel, pincel, con pases a les 11:00, 12:00, 13:00, 16:00 y 17:00 hores pa conocer y interpretar la información que nos proporcionen los fósiles; el públicu adultu puede sumase a les 12:30 hores a la visita de los llaboratorios y litoteca col equipu científicu del Muséu. Pa dambes actividades gratuites, con places limitaes, primero va ser necesario retirar invitación na Recepción del MUXA’l mesmu día de la actividá y siguiendo l’orde de llegada.

La fin de selmana tamién va poder completase la visita a la esposición permanente, col so costu habitual, col serviciu de baldre d’audioguíes col móvil pal públicu adultu o con una visita autoguiada, tamién col móvil, pal públicu familiar.

Parque de la Prehistoria de Teverga

El Parque entama’l 20 de mayu con La Ponte-Ecomuséu y el Conceyude Santu Adrianuuna xornada de baldre sobre Bioconstrucción nel pasáu y nel presente que va dar empiezu a les 12:00 hores. L’actividá incluye una visita a los averos de Santu Adrianu, na que se va esplicar los estremaos espacios d’hábitat de la Prehistoria y los materiales y técniques constructives que se pudieron utilizar, poniéndolos en rellación con construcciones más modernes como horros o teitos; pela tarde, nel Parque de la Prehistoria y gracies a l’Asociación d’Amigos del Hórreo Asturiano, el públicu va conocer les funciones y característiques d’esti elementu de l’arquiteutura mueble asturiana asitiáu fuera del equipamientu y facer un modelu d’horru recortable depués de la visita.

El 21 de mayu, a les 13:00 hores, va dase un taller de baldre de Prehistochapas pa públicu infantil de 4 a 11 años; y a les 16:00 hores Toño Argüelles presenta la so novela ambientada na Prehistoria, El corazón rojo, porque foi la visita al Parque de la Prehistoria de Teberga lo que-y sirvió d’inspiración pa la so obra última. Esti escritor asturianu, médicu de formación y estudiosu de la socioloxía y la historia, tamién tien espublizaos El año que nos comimos una turista rubia, Lobos disecados y Princesas de ojos azules.

Pa participar na Xornada del 20 de mayu y nel taller Prehistochapas, con places limitaes, ye preciso apuntase primero na web parquedelaprehistoria.es.