Un documental -Váter-casa-violín- y tres obres de ficción -Flechas, Hablar de estas cosas y Fracasar contigo- van distribuyise en certámenes cinematográficos nacionales y internacionales

Marina Parés, guionista y montadora; José Cabrera, director del Festival Tenerife Shorts; y Joan Ruiz, coordinador de Catalan Films & Tv, formaron la comisión de valoración d’esta convocatoria

08/06/2023.- El catálogu de distribución Llaboral Cinemateca Curtios suma esti mes cuatro trabayos nuevos: un documental y trés películes curties de ficción que dexen comprobar el talentu de los cineastes asturianos que se presenten a les convocatories d’esti programa, una ferramienta importante que la Conseyería de Cultura, Política Llingüística y Turismu pón a disposición de los creadores cinematográficos del Principáu pa la promoción y distribución de los sos trabayos en certámenes nacionales y internacionales dedicaos al curtiu.

Los curtios nuevos que van distribuyise por Llaboral Cinemateca son Váter-casa-violín de Laura Suárez Fernández; Flechas d’Imanol Ruiz de Lara; Hablar de estas cosas de Fernando Lorenzana; y Fracasar contigo de Mario Viñuela.

La comisión de valoración d’esta convocatoria del programa Curtiumetraxes Llaboral Cinemateca, a la que se presentaron un total de 15 trabayos, tuvo formada pola guionista y montadora Marina Parés, que trabayó con David P. Sañudo nel curtiu Ane, que formó parte del catálogu Llaboral Cinemateca Curtios y ganó’l Goya al Meyor Guión Adaptáu cola versión llarga d’esti curtiu; Joan Ruiz, coordinador de Catalan Films & tv pa la promoción del cine catalán; y José Cabrera, director del Festival Tenerife Shorts y programador na Selmana Internacional de Cine de Valladolid, SEMINCI.

Váter-casa-violín de Laura Suárez Fernández

Producíu como’l so trabayu de graduación na Universidá de Navarra, Laura Suárez compón un documental imaxinativu y enredador, onde comparte al tiempu parte del so procesu de construcción, llogrando una semeya estraordinaria d’un personaxe non menos estraordinariu: un home, Joseba Olazabal, qu’armáu con un violín combate cada día’l ruíu que produz el tráficu continuu de l’autopista que pasa al llau de la so casa. Un documental creativu sorprendente, delles veces divertíu, y enllenu d’audacia.

Flechas d’Imanol Ruiz de Lara

Fleches avérase a la congoxa adolescente, los celos y los filos quebradizos que sostienen l’amistá, elementos qu’españen na fiesta nocherniega y clandestina qu’un grupu de moces d’un internáu entamen nel ximnasiu del centru.

Gabrielle, Emma, Leire y Zoe salen a les escondidielles de los sos cuartos nun internáu pa pasar una nueche de fiesta nel ximnasiu del centru. Pero un secretu de Gabrielle y los celos de la so amiga Emma van provocar una tensión que se va descontrolar cuando Gabrielle entre nel ximnasiu con un arcu y les sos fleches. Drama teen y thriller psicolóxicu entemecíos con precisión dientro d’una atmósfera cada vez más intensa.

Hablar de estas cosas de Fernando Lorenzana

Fernando Lorenzana (Marcus, La distancia) vuelve construyir un drama íntimu al traviés de la rellación de dos personaxes, demostrando una madurez y evolución clares na so cinematografía. Esta vez son dos amigues, con unes vides y intereses que paez que garraron rumbos opuestos, que coinciden unos díes depués d’un tiempu ensin alcontrase.

Al traviés de delles conversaciones, la trama va afondando neses coses de les que cada vez falamos menos (l’amistá, el pasu del tiempu, los sentimientos), y que quiciás provoquen el nuestru aislamientu y dirixen el fracasu de les nuestres rellaciones.

Fracasar contigo de Mario Viñuela

Lucía espera a ver l’amanecer nuna playa una mañana d’iviernu de la que revive la so historia con Nacho, a quien nun escaeció tovía.

Xugando de contino colos saltos de tiempu, Viñuela iguó un puzle pa que l’espectador vaiga descubriendo la historia d’amor y desamor d’esta pareya. Una estructura qu’apurre al curtiumetraxe orixinalidá y ritmu a la hora d’averase a ún de los temes más universales.

Llaboral Cinemateca Curtios ye’l proyectu de distribución de curtiumetraxes asturianos de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.