La Conseyería de Ciencia ufierta una muestra con dalgunos de los proyectos y dispositivos piqueros que se realicen na rexón

La esposición, na que participen una ventena d'instituciones y empreses, dibuxa una Asturies industrial, conectada y innovadora cola vista puesta nel 2033

El Gobiernu del Principáu presenta nel so pabellón de la Feria Internacional de Muestres d'Asturies (Fidma) una muestra de la innovación industrial y el desenvolvimientu científicu y tecnolóxicu de la rexón de la mano d'una ventena d'instituciones y empreses. Sol lema Asturies despega camín del 2033: industrial, conectada y innovadora, la esposición plantega un percorríu per dalgunos de los proyectos y dispositivos más destacaos que se desenvuelven na rexón.

El conseyeru de Ciencia, Empreses, Formación y Emplegu, Borja Sánchez, y el comisariu de la esposición, David González, presentaron pela mañana los principales conteníos del pabellón, con un filu conductor que combina los ámbitos de la Estratexa d'Especialización Intelixente S3: Agroalimentación, avieyamientu activu y saludable, patrimoniu y biodiversidá, enerxía y circularidá y industria intelixente resiliente, coles misiones científiques asturianes

A lo llargo del percorríu, el visitante va poder conocer aplicaciones de robótica, realidá virtual y aumentada, impresión 3D, materiales nuevos y tecnoloxía 5G na industria, la investigación, la cultura, el deporte y l'entretenimientu.

Los visitantes van poder conocer daqué más sobre la innovación tecnolóxica aplicada a la industria asturiana, averase a la investigación sobre'l xenoma, l'agricultura de precisión, los satélites, la captura de CO2 o la enerxía fotovoltaica.  Van poder ver robots, meteoritos, tierra llunar simulada, un dron terrestre que llucha contra les quemes o'l vehículu de Zapadores Castor, fabricáu en Trubia pal Exércitu de Tierra.

La muestra ufierta tecnoloxía avanzada pa esguilar per una cadena d'ADN, por casu, contemplar hologrames de pieces históricu-artístiques, instalaciones audiovisuales de vanguardia y inclusive ver a “Duzín”, un pexe xurásicu atrapáu nel interior d'una roca.

La esposición inclúi pieces emblemátiques, como les bicicletes fabricaes n'Asturies con tecnoloxía abondo innovadora y utilizaes polos pilotos Fernando Alonso y Carlos Sainz.

Con una vocación d'averar la ciencia y la innovación tecnolóxica a la ciudadanía y a les families, la esposición ufierta un percorríu bien variáu nel que los más pequeños van poder escoyer ente trés misiones: esplorar l'espaciu, lluchar contra les quemes y conocer daqué más sobre l'agricultura del futuru. A la fin del percorríu van tener una recompensa.

Amás de los proyectos y elementos espositivos, el pabellón cunta con una parte importante dedicada a l'Axencia de Ciencia, Competitividá Empresarial y Innovación (Sekuens) del Gobiernu d'Asturies, encargada de xestionar les acciones de la I+D+i rexonal. Los visitantes van disponer tamién d'un rincón dedicáu a los nómades dixitales.

Como complementu a la parte espositiva, tán programaes distintes actividaes, nes que van participar centros d'I+D+i empresariales y nes que se va poner en valor les acciones d'innovación y atracción de talentu impulsaes dende Asturies.

A lo llargo de les dos selmanes que dura la feria, el pabellón va ufiertar más d'una ventena de talleres empobinaos al públicu infantil y xuvenil, con un ampliu abanicu d'actividaes centraes en fomentar l'interés pola investigación y la innovación y espertar vocaciones científiques.