03/10/2023.- La Viceconseyería de Cultura, Política Llingüística y Deporte entama la segunda edición del Reguerada Fest, un festival d’empresa y cultura n’asturianu que rinde homenaxe col so nome a Antón de Marirreguera, nacíu nel conceyu de Carreño y autor de la que se considera la primer obra lliteraria n’asturianu que se caltién.

Candás va convertise en puntu d’alcuentru de les diferentes disciplines artístiques y el mundu de la empresa y comunicación los díes 13, 14 y 15 d’ochobre, con una programación empobinada a tolos públicos qu’incluye una feria, recitales lliterarios, talleres, charles, esposiciones o conciertos que se van desenvolvese na Fábrica d’Ortiz, el Teatru Prendes, el Muséu Antón y la Biblioteca de Candás.

La inauguración de la esposición Filu/pallabra, una muestra artística de la uvieína Dido Carrero, va dar el pistoletazu de salida a les actividaes del Reguerada Fest el vienres 13 d’ochobre nel Muséu Antón.

La Fábrica d’Ortiz va acoyer el mercáu y feria de llibros y empreses con venti entidaes participantes y nun van faltar recitales poéticos, alcuentros con autores y meses redondes amás de proyecciones de películes asturianes, teatru con Teatru Carbayín y cuentacuentos con Carlos Alba y una ruta cultural y lliteraria per Candás. Van facese amás talleres d’escritura, d’estampación testil o de construcción de títeres pa tolos públicos.

A lo llargo del festival va haber conciertos de la Banda de Gaites de Candás, Algaire y d’Alicia Álvarez y el so Kíkiriki pal públicu infantil; Nacho Vegas va tocar los sos Cantares dende´l pie y va haber, amás, un pasucáis al cargu del Grupu de Baille San Félix, ente otres actividaes.

Toles actividaes van ser gratuites. Los detalles de la programación, coordinada por Xaime Martínez, tán disponibles equí.