• El ciclu de cine itinerante de Llaboral Cinemateca va xirar esti trimestre per 25 localidaes asturianes con un programa qu’incluye la comedia Vamos a volvernos locos del cineasta José Luis Velázquez
• La cartelera complétenla la comedia romántica Crónica de un amor efímero d’Emmanuel Mouret; la comedia negra Sick of myself de Kristoffer Borgli; la última película d’Hong Sang-soo, En lo alto; y la cinta d’animación El viaje de Ernest y Celestine

09/10/2023.- La Cinemateca Ambulante vuelve a ponese en marcha esta seronda con una programación amplia qu’ufierta un total de 92 proyecciones, toes de baldre y en versión orixinal subtitulada n’español, en 25 localidaes de 22 conceyos asturianos. Esti trimestre collaboren nel ciclu los conceyos de Cabrales, Cangues d’Onís, Cangas del Narcea, Castrillón, Colunga, Llangréu, Llanera, Llanes, Mieres, Nava, Navia, Noreña, Piloña, Ribedeva, Ribeseya, Siero, Sobrescobiu, Sotu’l Barcu, Tinéu, Valdés, A Veiga y Villaviciosa.

La programación, ellaborada pol Festival Internacional de Cine de Xixón, incluye la comedia Vamos a volvernos locos de José Luis Velázquez, una película rodada dafechu n’Asturies y con profesionales del Principáu. El director madrilanu con residencia n’Uviéu firma una comedia alredor d’una boda con nomes imprescindibles de la interpretación asturiana, como Félix Corcuera o Manuel Pizarro.

Esta película ye precuela del curtiu del mesmu títulu, onde se muestra a la familia de Manolo (el fináu) nel velatoriu, mentes él pasia pela sala comentando lo absurdo del so propiu funeral. Lloñe de continuar con otru entierru, Velázquez lleva a la familia a una boda. Esta vez va ser Álex -la fía bohemia de Manolo- quien va xubir al altar, mentes que la so hermana Nati va ser la encargada d’asegurar que la ceremonia salga a la perfección.

Tamién en clave de comedia, pero negra, va proyectase Sick of myself, del noruegu Kristoffer Borgli, que reflexona sobre la obsesión pola imaxe de la sociedá d’anguaño.

Signe y Thomas son una pareya d’artistes contemporáneos con una rellación pertóxica marcada pola competitividá. La so rellación poco saludable da un xiru poco saludable nel momentu en que Thomas algama una notoriedá grande nel so círculu profesional. Como respuesta, Signe va facer un intentu desesperáu por recuperar el so estatus y atrayer otra vuelta l’atención al traviés de la creación d’una personalidá nueva y enfermiza.

El cineasta francés Emmanuel Mouret dirixe Crónicas de un amor efímero, una comedia romántica que pon el focu nuna pareya, una madre soltera y un home casáu, que se convierten n’amantes cola idea de que la so rellación namás seya una aventura. Sicasí, cada vez que se ven más se sorprienden pol so entendimientu, la so alquimia y el placer de tar xuntos…

Tamién va poder vese na cartelera de La Cinemateca Ambulante la última película del multipremiáu director surcoreanu Hong Sang-Soo que presenta En lo alto, una cenciella película minimalista, filmada en blanco y negro, sobre’l pasu del tiempu y l’aceptación de los cambeos.

El famosu cineasta Byungsoo y la so fía Jeongsu, a la que lleva años ensin ver, visiten a la señora Kim, una antigua amiga del director, pa que-y aconseye a la so fía sobre la carrera. Kim, diseñadora esperta d’interiores, ye agora propietaria d’un afayadizu edificiu de cuatro altures ensin ascensor. Mentes xuben ún a ún los pisos del edificiu, dende’l suétanu a l’azotea, a Byungsoo ábrense-y bien de posibilidaes pa cambiar la so vida, en busca de salú, amor y inspiración.

Completa la programación la película El viaje de Ernest y Celestine, una historia tienra d’amistá ente un osu y una ratonina que van xuntar les sos fuercies pa llograr que la música vuelva a tar permitida nel país de los osos. Ernest y Celestine vuelven al país d’Ernest, la Charabie, pa poder iguar el so guapu violín estropeáu, pero al llegar descubren que la música ta prohibida en tol país dende va años. Pa ellos, ¡ye imposible vivir ensin música! Cola ayuda de los sos cómplices, ente los que s’atopa un xusticieru misteriosu amazcaráu, Ernest y Celestine van intentar poner fin a esta inxusticia, pa poder traer otra vuelta l’allegría al país de los osos.

Información completa de les proyecciones, feches y horarios en laboralcinemateca.es.