Marisa Valle Roso, Alienda, José Manuel Tejedor y Vero Rubio, finalistes del gallardón, van actuar nesti eventu nel que va escoyese’l cantar ganador

06/11/2023.- El Teatru de la Llaboral acueye esti domingu 12 de payares, a les 19:00 hores, la gala final na que va escoyese’l cantar ganador del XV Premiu Camaretá al Meyor Cantar.

Marisa Valle Roso, Alienda, José Manuel Tejedor y Vero Rubio, finalistes del gallardón, van actuar nesti eventu nel qu’un xuráu formáu por especialistes en música y llingua asturiana va ser l’encargáu de decidir el cantar premiáu. Los cuatro cantares finalistes d’esta edición son:

• Tonada, de Marisa Valle Roso, con lletra de la mesma intérprete llangreana sobre una estrofa tradicional.
• Zanca de cabra, d’Alienda, con lletra de Roberto González-Quevedo sobre una estrofa tradicional.
• Les tos nales, de José Manuel Tejedor, con lletra de Gema Fernández.
• Dixo miou padre, de Vero Rubio, con lletra de la mesma multiinstrumentista.

Na gala tamién va actuar el grupu Algaire, ganador de la edición anterior d’esti premiu col tema Coral y maera.

El Premiu Camaretá al Meyor Cantar, dotáu con 6.000 euros, promuévelu la Viceconseyería de Cultura, Política Llingüística y Deporte cola mira de consolidar, prestixar y arriquecer la creación musical tanto n’asturianu como n’eonaviegu.

La entrada ye llibre hasta enllenar aforu, con retirada previa d’invitación na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, en unientradas.es y na web de la Llaboral.