08/11/2023.- El director xeneral d’Acción Cultural y Normalización Llingüística, Antón García, visitó esta mañana’l stand del Gobiernu del Principáu en Mercartes, la principal cita profesional dedicada a les artes escéniques que se celebra hasta’l 9 de payares en Valladolid y que va axuntar a 1.200 profesionales del sector.

El Gobiernu cunta con un stand propiu que pon el focu nel circuitu d’artes escéniques d’Asturies, Cultura en Rede, el proyectu de la Viceconseyería de Cultura, Política Llingüística y Deporte fechu en collaboración colos Conceyos asturianos que permite la programación d’espectáculos de gran calidá per tol Principáu y da más visibilidá a les compañíes profesionales y a artistes de la rexón. Asina, nel marcu del circuitu d’artes escéniques programáronse y van celebrase 233 espectáculos en 48 conceyos a lo llargo de tol añu 2023.

El stand del Principáu cunta con espaciu d’atención al públicu, con una zona de trabayu a disposición de les compañíes y con un videu que va proyectar de siguío información de les 88 compañíes asturianes que formen parte del Catálogu de l’Actividá Escénica Asturiana. Amás, ta disponible’l catálogu d’EscenAsturias, presentáu esta mañana, que incluye los detalles y contactu de les compañíes profesionales que formen parte d’esta asociación.

Na so visita a Mercartes, Antón García detalló delles de les midíes y actuaciones del Principáu en materia d’artes escéniques, como la continuidá del programa de circuitos d’Asturies, Cultura en Rede, que tien abierta la convocatoria pa la selección de proyectos que se van programar nel primer semestre del añu que vien, y la organización d’una muestra nueva d’artes escéniques.

El Principáu tamién tien prevista la puesta en marcha nel 2024 de la Rede de Teatros Asturianos, un órganu d’adhesión voluntaria y participación institucional que busca impulsar y coordinar los proyectos, actividaes y actuaciones d’artes escéniques ente los Conceyos dotaos con equipamientos escénicos abondos y al que puedan sumase les empreses d’artes escéniques profesionales.

El director d’Acción Cultural destacó amás el llabor del Centru de Recursos Escénicos, un proyectu con sede na Llaboral que sofita la creación y investigación escénica de los profesionales de la rexón, apurriendo recursos materiales y humanos del Teatru de la Llaboral pa la concepción, creación y puesta n’escena de la obra. 12 compañíes asturianes yá se beneficiaron anguaño del Programa de Residencies del Centru, qu’acaba d’abrir una convocatoria nueva pal primer semestre del añu que vien.

Amás, Llaboral Ciudá de la Cultura collabora con profesionales de la cultura y el trabayu artísticu emprestando temporalmente los espacios escénicos del Teatru, del Paraninfu, de les sales d’ensayos (Sala Azul, Sala Mariella y Sala Naranxa), amás del platO de LLABoral Centru d’Arte, coles sos dotaciones técniques respectives pal desenvolvimientu de proyectos artísticos de cualquier clas. Nel marcu de la cesión temporal d’espacios escénicos, de xineru a payares d’anguaño, 22 compañíes solicitaron na Llaboral un total de 386 xornaes d’ensayos nos camerinos colectivos y les Sales Azul, Mariella y Naranxa; a lo que se sumen otres 10 xornaes de cinco compañíes y artistes nel Teatru y el platO del Centru d’Arte.