15/11/2023.- Asturies, Cultura en Rede avera esta selmana la cultura tradicional al públicu con podcast en directo y música y cantares asturianos.

Les periodistes Aitana Castaño y Marta Pérez van grabar Dalle mio nena, el primer podcast rural en clave femenina d’España, esti xueves 16 de payares en La Ribera y el día 17 n’A Veiga. El grupu Calea -con Silvia Quesada, Rubén Bada y Leticia Baselgas- va poner el so toque personal a la música tradicional esti vienres 17 en Castrillón y Ensemble L’Arca va facer un percorríu pelos cantares tradicionales asturianos en Cántote, que si te conto nun me crees el sábadu 18 en Navia.

El circuitu de cultura tradicional d’Asturies, Cultura en Rede tamién incluye hasta últimos d’añu bien de propuestes per dellos requexos del Principáu. David Varela ufierta en Restolando cuentos, cantares y poemes xunto a melodíes tradicionales asturianes en Santalla d'Ozcos (22 de payares) y Toli Morilla va xuntar la música con delles de les autores asturianes más destacaes en Mujeres Poetas en canciones en Nava (22 de payares). Alanza va llevar La Navidá n’Asturies a Ribeseya (1 d’avientu) y Balmonte de Miranda (22 d’avientu); Teatro del Cuervo, Xustina y Xacinta (Camín de la batalla de Cuadonga) a Cangas del Narcea (20 d’avientu); Elisabet Martín Teatro, Cuentos de Navidá a Ḷḷena (27 d’avientu) y Grau (28 d’avientu); y Carlos Alba, “Cellero”, el monólogu a Gozón (29 d’avientu).

Amás, Roberto Lorenzo (AV Studio) va facer mico-mappings sobre patrimoniu en Ribadeva (22 d’avientu) y vamos tener xuegos tradicionales nes Olimpiaes asturianes de La Buelga en Llangréu (28 d’avientu).

La programación pue consultase n’asturiesculturaenrede.es. Los circuitos d’Asturies, Cultura en Rede son un proyectu de la Viceconseyería de Cultura, Política Llingüística y Deporte, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.