29/11/2023.- Estilos musicales variaos tán presentes na programación del circuitu de música d’Asturies, Cultura en Rede pa les selmanes vinientes.

El tenor Emilio Ménendez, ún de los cantantes llíricos de canción asturiana de más sonadía de la escena de la nuestra rexón, va facer un repasu a cuasi un sieglu de cantares y vezos asturianos cola Antología Lírica de Asturias que va presentar el 30 de payares en Cangas del Narcea.

El dúu Música de Sofá, formáu por Lucía Alonso Pardo y Jacobo Cano, va percorrer países y estilos nel viaxe musical que van facer el 1 d’avientu en Gozón y Chus Pedro y Pipo Prendes van interpretar los cantares de La Mina y el Mar el día 2 viniente en Siero.

El Dúo Amati va repasar villancicos de toles partes del mundu, ensin olvidar los asturianos, el 23 d’avientu en Casu y Alicia Álvarez va ufiertar el día 27 en Llangréu un conciertu acústicu empobináu al públicu infantil y familiar colos cantares n’asturianu del so llibro-discu Kikirikikí.

La programación puede consultase n’asturiesculturaenrede.es. Los circuitos d’Asturies, Cultura en Rede son un proyectu de la Viceconseyería de Cultura, Política Llingüística y Deporte, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.