Cultura quier reconocer a les persones que caltienen l’asturianada, «una parte fundamental del nuestru patrimoniu cultural inmaterial»

La final del concursu va celebrase’l 29 de payares nel Teatru de La Llaboral y va grabala la TPA

28/10/2024.- La conseyera de Cultura, Política Llingüística y Deporte, Vanessa Gutiérrez, presentó’l Premiu Obdulia Álvarez ‘La Busdonga’ d’Asturianada esta mañana en Llaboral Ciudá de la Cultura. La conseyera destacó’l compromisu del Gobiernu d’Asturies «pa crear el premiu autonómicu que güei ve la lluz, rindiendo honor a una muyer que na primer metá del sieglu XX impúnxose a los estereotipos de la dómina y foi quién a destacar pol so talentu musical».

D’esta forma, Vanessa Gutiérrez esplicó que la Conseyería de Cultura quier «reconocer a toes eses persones que caltienen, en cada rincón d’Asturies, una parte fundamental del nuestru patrimoniu cultural inmaterial: l’asturianada».

La presentación del gallardón musical recién creáu coincide güei cola publicación en Boletín Oficial del Principáu d’Asturies (BOPA) de la respectiva convocatoria. Esta resolución marca un plazu de 10 díes pa inscribise, amás de trés categoríes: la masculina, dotada con 6.000 euros; la femenina, con 6.000 euros y la moza, con 3.000 euros. Esta última ta dirixida a intérpretes menores de 22 años. En toles fases, la llingua vehicular va ser l’asturianu.

Na presentación, la conseyera tuvo acompañada pol director xeneral d’Acción Cultural y Normalización Llingüística, Antón García, y polos representantes de la mayoría de los concursos y conceyos que participen nesti premiu de canción asturiana: José Manuel González Granda, Valentín Fuente Álvarez, Laude Martínez Fernández, Patricia Miriam Martínez, Diego Lobo y Valentín Fuente Álvarez. Amás de Miguel Ánxel Montenegro, d’AFATRA (Asociación de Folclore Amigos de la Tradición).

Van poder optar a facese col gallardón aquelles persones que participaren en dalgún de los certámenes locales d’asturianada y que s’alcuentren ente les seis primeres clasificaes na so categoría. Los concursos locales incluyíos son: “Ciudá de Llangréu” (2023), “Ciudad de Oviedo” (2024), “Conceyu Siero” (2024), “El Comercio” (2024), “Valle del Narcea” (2024), “Valles d’Ayer” (2024) y “Villa de la Avellana” (2024).

El concursu va desenvolvese en dos fases. La primera va consistir nes semifinales, programaes d’esta manera:

Domingu, 10 de payares: Cangas del Narcea.

Vienres, 15 de payares: La Pola Siero. 

Vienres, 22 de payares: La Felguera.

La gran final va celebrase’l vienres 29 de payares nel Teatru de la Llaboral, en Xixón. Tolos detalles pueden consultase na convocatoria publicada en BOPA al traviés d’esti enllaz: https://acortar.link/fmcukJ

La asturianada y ‘La Busdonga’

L’asturianada, presente na cultura rexonal dende va sieglos, foi un mediu esencial pa la tresmisión oral de tradiciones, vezos y la esencia del paisaxe asturianu. La so práctica integra dellos elementos que la convierten nun símbolu d’identidá y cohesión, auniendo y fortaleciendo’l texíu social d’Asturies.

L’asturianada foi declarada bien d’interés cultural (BIC) de calter inmaterial nel 2015, reconociendo’l so valor únicu como espresión musical y patrimoniu inmaterial d’Asturies.

Pa esti certame, la Conseyería de Cultura escoyó’l nome d’Obdulia Álvarez Díaz, conocida como “La Busdonga”, col propósitu de facer homenaxe a la trayectoria d’una muyer que nel sieglu XX destacó pol so talentu musical escepcional. La so habilidá vocal sigue siendo anguaño una fonte d’inspiración pa munches intérpretes.