Van poder presentase llargumetraxes o curtiumetraxes, de ficción o non ficción, con un valor creativu singular

Los creadores o empreses audiovisuales interesaos van poder presentar los sos proyectos hasta'l 12 de marzu

12/02/2021.- Llaboral Cinemateca llanza una convocatoria nueva del Programa de patrocinios pa proyectos cinematográficos asturianos, nun apueste pol desarrollu y fortalecimientu del sector audiovisual de la rexón. Esta iniciativa tien como oxetivu venceyar y asociar la imaxe de Llaboral Cinemateca cola industria audiovisual d'Asturies por aciu de la participación como patrocinador nel desenvolvimientu de proyectos cinematográficos de valor creativu singular que se realicen nel Principáu. Llaboral Cinemateca ye l'espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.

El programa ta dirixíu a los profesionales y creadores asturianos o con residencia nel Principáu d'Asturies qu'incluyan nel so oxetu social la creación y producción cinematográfica, que van poder presentar llargumetraxes o curtiumetraxes enmarcaos tantu na categoría de ficción como na de non ficción. Queden escluyíos aquellos trabayos de calter publicitariu, promocional o periodísticu.

Nesta nueva convocatoria va escoyese un máximu de dos proyectos na categoría de Llargumetraxes -con una cuantía, tamién máxima, de 14.900 euros por propuesta- y un proyectu na categoría de Curtiumetraxes que va recibir un máximu de 5.000 euros. Na selección de los proyectos van valorase la calidá artística y técnica del trabayu, la orixinalidá y el riesgu de la propuesta y la participación significativa d'equipu técnicu y d’actores asturianos. Otramiente, va tenese en cuenta la viabilidá técnica y artística del proyectu en relación a los medios de los que se dispón, amás d'otros criterios sociales.

El formulariu de solicitú, mesmo que les bases completes de la presente convocatoria, tán disponibles na web de Llaboral Cinemateca www.laboralcinemateca.es y tendrá de presentase, debidamente cubiertu y con tola documentación riquida, al traviés de la dirección de corréu electrónicu info@laboralcinemateca.esenantes del 12 de marzu de 2021.

Descarga les bases completes de la convocatoria 2021.

Descarga´l formulariu oficial.