La convocatoria de la Conseyería de Cultura va llevar 134 proyectos de 106 compañíes, grupos y creadores asturianos a 39 conceyos

La planificación de La Cinemateca Ambulante inclúi siete llargumetraxes de non ficción de cineastes del Principáu

Vienres, 19 de febreru de 2020.- Los circuitos culturales puestos en marcha pola Conseyería de Cultura, Política Llingüística y Turismu, al traviés del programa Asturies Cultura en Rede, pal primer semestre de 2021 van movilizar 439.472 euros pa la programación de 460 actividades en 39 conceyos asturianos.

Esta planificación respuende a la escoyeta fecha de les convocatories llevaes a cabu por Cultura pa los circuitos de Música, Artes Escéniques, Lliteratura, Cultura Tradicional y Artes Plástiques y Visuales, y al programa del circuitu cinematográficu Llaboral Cinemateca. La convocatoria de la conseyería va llevar 134 proyectos de 106 creadores, grupos y compañíes asturianes a los 39 conceyos que collaboren nos seis circuitos culturales.

Llaboral Cinemateca y La Cinemateca Ambulante van programar 230 proyecciones, ente les que s´alcuentren siete llargumetraxes de non ficción fechos polos cineastes del Principáu Carlos Navarro, Elisa Cepedal, Tito Montero, Marcos M. Merino, Ramón Lluís Bande, Manuel García Postigo y Alberto Vázquez García.

La conseyería decidió l´añu pasáu la creación de los circuitos p´ampliar la ufierta dirixida a creadores de les distintes disciplines culturales col envís de sofitar y impulsar el sector y, coles mesmes, facilitar la programación d´espectáculos y eventos a los conceyos asturianos.

Les cifres por circuitos

Los circuitos culturales ríxense por un sistema de cofinanciación ente les alministraciones locales y el Gobiernu asturianu onde la Conseyería de Cultura aporta ente´l 50% y el 90% del presupuestu de cada esposición, espectáculu o eventu cultural. Esti porcentaxe varia según la población de los conceyos, de manera qu´a aquellos con menos habitantes dáse-yos siempre un sofitu mayor.

Las cifres detallaes de los distintos circuitos culturales son estes:

• Circuitu d´Artes Escéniques. Los 45 artistes o compañíes escoyíos van presentar 63 actividaes diferentes en 86 representaciones, programaes por 35 conceyos. A esti circuitu destínense 195.128 euros na convocatoria d´esti semestre.

• Circuitu de Música. Los 27 artistes o grupos solicitaos por 31 conceyos van protagonizar 34 actuaciones. La inversión pa esti circuitu ye de 99.592 euros.

• Circuitu de Cultura Tradicional. Trece compañíes llevarán 18 propuestes distintes a 22 conceyos en 67 actuaciones. Al circuitu destínense 40.682 euros.

• Circuitu de Lliteratura. Los 17 proyectos de 13 creadores van llegar a 28 conceyos en 51 actividaes. Nesta convocatoria, la inversión ye de 51.070 euros.

• Circuitu d´Artes Plástiques y Visuales. Ocho artistes presenten 9 propuestes que van poder vese en 15 muestres en 8 conceyos. La inversión de la conseyería nesti circuitu yá se fizo efectiva en 2020. Cultura asumió daquella los costes de producción de 14 proyectos a los que destinó 89.269 euros.

• Llaboral Cinemateca. El circuitu de cine asturianu va destinar 13.000 euros a mediu centenar de proyecciones en Llaboral Ciudá de la Cultura, y La Cinemateca Ambulante va invertir 40.000 euros en 180 proyecciones per toa Asturias.