La Conseyería de Cultura, Política Llingüística y Turismu  fai homenaxe al escritor de Mieres coincidiendo esta 42 edición colos diez años de la so muerte y los 75 del so nacimientu

La Selmana de les Lletres Asturianes va incluyir na programación de la so 42 edición la organización de dos esposiciones y la presentación d’un documental y de dos llibros sobre la vida y la obra de Nel Amaro, iniciatives preparaes a costafecha pa la ocasión. La Conseyería de Cultura, Política Llingüística y Turismu fai homenaxe nesta edición de la Selmana al escritor de Mieres coincidiendo colos diez años de la so muerte y los 75 del so nacimientu.

Les actividaes, como ye tradición, van programase na primer selmana de mayu d’esti añu, y nesta 42 edición van tar empobinaes pol escritor y profesor Xandru Fernández, quien s’encarga de coordinar les publicaciones y principales conteníos del homenaxe institucional y ciudadanu a la figura de Nel Amaro.

Los dos llibros que la Dirección Xeneral de Política Llingüística va publicar con motivu del homenaxe, van ser una estensa antoloxía de la obra de Nel Amaro, seleccionada y comentada por Xandru Fernández, y un volumen colectivu qu’inclúi artículos d’escritores y investigadores sobre l’escritor y el so tiempu, igual que material gráfico abondo.

La Conseyería de Cultura ta trabayando na preparación de les actividaes de la Selmana de les Lletres Asturianes cola colaboración de dellos colectivos, instituciones, creadores y investigadores, y especialmente en coordinación con LLABoral Centru d’Arte y los conceyos de Mieres y Lena, a los que Nel Amaro tuvo especialmente vinculáu.

Nel Amaro (1946-2011) axunta a la so faceta de creador lliterariu la condición de persona activa y determinante na vida social y cultural d’Asturies. Novelista, dramaturgu, editor de revistes, autor de performances o introductor de la poesía visual n’Asturies, Nel Amaro ye ún de los escritores más versátiles y prolíficos de la lliteratura asturiana moderna.

Ún de los oxetivos principales de la Selmana de les Lletres Asturianes ye la recuperación y espardimientu d’un autor o autora, p’amestar el so nome a la nómina de los clásicos de la lliteratura asturiana. N’ediciones anteriores fueron homenaxaos, ente otros, Antón de Marirreguera, Xosefa Xovellanos, Xuan María Acebal, María Josefa Canellada, Enriqueta González Rubín, Mánfer de la Llera o María Teresa Villaverde, Tuxa.