Nominada al Oscar a Meyor Película Estranxera y proyectada na Sección Oficial del Festival de Cannes, esta comedia ácida va poder vese en 15 conceyos asturianos.

El programa d’esti trimestre incluye la proyección de la sorprendente Bacurau, Premiu del Xuráu en Cannes, de los brasileños Kleber Mendonça Filho y Juliano Dornelles, y la cinta asturiana Obertura de un milagro de Juan Luis Ruiz.

15/04/2021.- La Cinemateca Ambulante súmase a la celebración del centenariu del nacimientu de Luis García Berlanga, el gran maestru del cine español, y failo cola proyección d’una comedia tan ácida como Plácido, que va poder vese esti trimestre en 15 conceyos asturianos. La Cinemateca Ambulante ye’l ciclu de cine itinerante de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica ufiertada pola Cinemateca Ambulante ta coordinada pol Festival Internacional de Cine de Gijón/Xixón.

Nominada a los Oscar como meyor película de fala non inglesa y proyectada na sección oficial del Festival de Cannes, Plácido ta considerada como la obra maestra del cineasta valencianu que retrata con humor y ironía les contradicciones d’una sociedá convulsionada pol franquismu. Nuna ciudá pequeña y provinciana, unes burgueses folgaes discurren la idea d’entamar una campaña navidiega col lema "Siente a un probe a la so mesa". Trátase de que los más necesitaos compartan la cena de Nuechebona con families acomodaes y disfruten de la calor y l’afectu que nun tienen. A Plácido contratáronlu pa participar col so motocarru na cabalgata, pero surde un problema que-y quita de centrase nel so trabayu: esi mesmu día vence la primer lletra del vehículu, que ye’l so únicu mediu de vida.

Con Plácido empieza la collaboración fructífera de Berlanga col guionista Rafael Azcona -xuntos diben crear películes maxistrales como El Verdugo, La escopeta nacional o La vaquilla- y ye tamién la primer vez que’l director usa de forma sistemática’l planu secuencia, una opción narrativa que lu va convertir nún de los grandes maestros del cine européu.

Un total de 17 conceyos collaboren nesta edición del ciclu de cine itinerante de Llaboral Cinemateca, qu’arrinca’l vienres 23 d’abril nel Centru de Cultura "La Casona" de Campumanes (Ḷḷena) cola proyección de Y llovieron pájarosde Louise Archambault. La cineasta canadiense lleva al cine la novela de Jocelyne Saucier y presenta una película intimista que cunta la historia de trés vieyos que deciden retirase al monte pa disfrutar lo que-yos queda de vida.

A Veiga, Cabrales, Cangas del Narcea, Cangues d’Onís, Castrillón, Colunga, Gozón, Llangréu, Nava, Navia, Noreña, Piloña, Siero, Tinéu, Valdés y Villaviciosa son, xunto a Ḷḷena, los conceyos que van proyectar el catálogu de La Cinemateca Ambulante, qu’incluye la estravagante y sorprendente Bacurau, Premiu del Xuráu en Cannes, onde Kleber Mendonça Filho (Doña Clara) y Juliano Dornelles mecen western, cine d’autor o’l thriller más sangrientu, ensin escaecer la ciencia ficción o’l drama.

El cine con sellu asturianu llega esti trimestre de la mano del realizador Juan Luis Ruiz y la so película Obertura de un milagro, un filme presentáu nel Festival Internacional de Cine de Gijón/Xixón que descubre por qué y cómo un neñu de la guerra español emigráu a la URSS en 1937 acaba trabayando con un cineasta rusu tan aclamáu como Andréi Tarkovski nuna de les sos películes más emblemátiques, El espejo.

Completa la programación el segundu llargumetraxe del irlandés David Freyne, Dating Amber, onde esplora la sexualidá adolescente al traviés de la historia de dos mozos homosexuales que faen como que son pareya p’aforrar de que toos especulen sobre la so orientación sexual. Esta película llega a La Cinemateca Ambulante gracies a la collaboración col Festival de Cine LGTBI qu’entama’l Centru Niemeyer.

La programación de La Cinemateca Ambulante pue sufrir modificaciones a tenor de la evolución de la pandemia por Covid-19. Aconseyamos consultar les feches y horarios de les proyecciones en www.laboralcinemateca.es.