El Gobiernu pon a disposición del sector cultural delles zones del equipamientu, amás d’asesoramientu y personal técnico

07/06/2021.- La Conseyería de Cultura, Política Llingüística y Turismu pon a disposición de los creadores artísticos asturianos que lo soliciten dellos espacios de Llaboral Ciudá de la Cultura y Llaboral Centru d’Arte, pente medies de la cesión temporal. El departamentu que dirixe Berta Piñán pon en marcha d’esta manera una de les midíes anunciaes de sofitu al sector nel so apueste pola reactivación de la cultura n’Asturies. 

La finalidá de la propuesta de la Conseyería de Cultura ye que profesionales d’Asturies o residentes na comunidá puedan acceder temporalmente a los espacios ufiertaos pa desenvolver los sos proyectos de creación y de producción. Concretamente, les zones que Llaboral Ciudá de la Cultura incluye nesta convocatoria son l’espaciu escénicu del Teatru de la Llaboral, los sos trés sales d’ensayu y el Paraninfu, mentes que Llaboral Centru d’Arte añede a la convocatoria’l so espaciu plat0.

Amás de la infraestructura física, los equipamientos van emprestar, según cada solicitú, una partida de recursos añedíos. Asina, en Llaboral Ciudá de la Cultura ponse a disposición de les persones beneficiaries de la cesión los camerinos que se consideren necesarios pal desenvolvimientu de l’actividá. Amás, va poder solicitase material mobiliario o equipu de soníu pa les sales d’ensayu. Tamién, previa autorización del equipu técnicu, ufiértase la cesión del rider técnicu del Teatru de la Llaboral y del Paraninfu, siempre que’l material tea disponible.

A lo llargo del periodu d’estancia nos espacios, va poder pidise l’ayuda d’un responsable técnicu del equipu de Llaboral Ciudá de la Cultura pa dar soporte y cobertura al desenvolvimientu de los proyectos.

Los requisitos pa la presentación de solicitúes p’acceder a la cesión temporal de los espacios puen consultase nes páxines web de Llaboral Ciudá de la Cultura (www.laboralciudaddelacultura.com) y de LLABoral Centru d’Arte (www.laboralcentrodearte.org).