Diecinueve conceyos van ufiertar 46 actividaes lliteraries, teatrales y musicales de 15 creadores y artistes asturianos

14/06/2021.- La Conseyería de Cultura, Política Llingüística y Turismu, al traviés de la Dirección Xeneral de Política Llingüística, presentó la programación hasta últimos d’añu del circuitu Autores nel camín 2021, protagonizáu por escritores y artistes de la nómina de ganadores de los premios en llingua asturiana de les convocatories del 2019 y 2020, amás de dos autores en gallego-asturianu.

Quince creadores y artistes asturianos van ufiertar 46 actividaes en 19 conceyos dende esti miércoles, 16 de xunu, hasta avientu d’anguaño. Los alcuentros, llectures y recitales lliterarios van tar protagonizaos por Francisco Álvarez, Xune Elipe, Ruma Barbero, José Ángel Gayol, Sidoro Villa, María José Fraga, Emma Méndez, Alejandro Fernández Osorio, Inaciu Galán y Vero Suari, Alberto Vázquez y Gonzalo G. Barreñada.

La compañía de teatru Higiénico Papel va llevar la obra El viaxe de Covaletti a Grau, Castrillón y Candás, y la compañía Factoría Norte va representar Les relaciones peligroses en Llangréu, Grau, Ḷḷena y Corvera. Rodrigo Cuevas, pela so parte, va llevar Rambalín el mes d’avientu a los conceyos d’Avilés, Grau, Corvera, Villaviciosa, Candás, Cangas del Narcea y Bimenes. 

El proyectu Autores nel camín, qu’estrena logo, surdió pa poner en contactu al públicu asturiano colos y les autores y artistes que ganen los premios convocaos pola conseyería, los más prestixosos de les lletres asturianes. La iniciativa ye posible gracies a la participación activa de los Servicios de Normalización Llingüística, y cola intención de la Dirección Xeneral de Política Llingüística d’incorporar progresivamente la collaboración de biblioteques y cases de cultura.