• La Conseyería de Cultura escoyó 14 proyectos que se van representar hasta últimos d’añu en conceyos pelos que pasa’l Camín de Santiago
• Esta iniciativa, enmarcada nel programa Asturies, Cultura en Rede, dispón de 55.676 euros de presupuestu

El Gobiernu d’Asturies va inaugurar el domingu en Tinéu’l nuevu circuitu cultural Xacobéu pa promocionar l’añu santu compostelanu al traviés de proyectos rellacionaos col Camín de Santiago que se van representar en conceyos pelos que pasen les rutes xacobees. En total, escoyéronse 14 propuestes de doce artistes, profesionales y empreses asturianes que se van amosar en 18 conceyos hasta avientu. Música, artes escéniques y videomapping conformen les actividaes d’esta iniciativa, que s’enmarca nel programa de circuitos culturales Asturies, Cultura en Rede, y al que la Conseyería de Cultura, Política Llingüística y Turismu destina 55.676 euros.

Asina, Carlos Alba Cellero va presentar en Tinéu El Xuglar del Camín, una serie d’histories, lleendes, cuentos, romances y coples cantaes al son de la bandurria sobre’l Camín Primitivu. Pela so parte, Anabel Santiago va llevar a Tapia La muyer nel Camín, cola mira de difundir el cancioneru popular de les rutes xacobees al traviés de la óptica femenina y al traviés de dellos xéneros musicales. Amás, Slum Suit va facer en Llanes un repasu de la música que pue escuchase nel Camín con un cuartetu de jazz y la gaita como insturmentu solista en Siguiendo el camino de Iturralde.

La Orquesta Céltica Asturiana va ufiertar en Salas el conciertu pedagóxicu Pasu a pasu, músicas del Camín, y Héctor Braga en Colunga Sonidos del Camino, un espectáculu qu’amuesa los raigaños culturales rellacionaos col Xacobéu al so pasu pel Principáu. La soprano asturiana Tina Gutiérrez y la cantante gallega Lucia Pérez van amosar en Corvera y Mieres los cantares más representativos del repertoriu tradicional de dambos territorios n’Asturias y Galicia: unión de dos culturas. Amás, Celso Díaz Band va actuar en Pravia, Eva Tejedor & Les Pandereteres, en Ḷḷena, y Alfredo González, n’A Veiga.

Guayominí Producciones va desvelar en Carreño histories, mitos, cosadielles y poemes al traviés de los güeyos d’una pelegrina venida de tiempos bien antiguos en Leyendas del Camino, mentes que El Callejón del Gato va conducir al públicu en Sotu’l Barcu per un viaxe de fantasía y humor nel sieglu XVII con Concha, Bardón y Calabaza, pícaros y peregrinos.

Les aventures y andances d’un mozu escuderu nel so viaxe xunto al rei Alfonso II el Castu a Santiago de Compostela van llegar a El Franco, Grau, Navia y Siero de la mano d’Escenapache en Manín y el primer pelegrín, mentes que de la mano d’Higiénico Papel Teatro dos pícaros charranes y un músicu mudu van cuntar en Villaviciosa la historia de los doce reis que tuvo Asturies, destacando les histories rellacionaes col Camín de Santiago, en Diestro y Siniestro por el Camino.

La lluz qu’alluma a los pelegrinos va ser la protagonista de los videomapping de Roberto Lorenzo, que va presentar en Castropol una concatenación d’imáxenes sobro los caminos de Santiago n’Asturies.

Les feches y horarios puen consultase nel programa axuntu y na web www.asturiesculturaenrede.es, onde s’actualiza la información.

Asturies, Cultura en Rede

El proyectu Asturies, Cultura en Rede, impulsáu por Cultura en collaboración colos conceyos y xestionáu pola Sociedá Pública de Xestión y Promoción Turística y Cultural, incluye circuitos temáticos d’artes escéniques, artes visuales, música, cultura tradicional y lliteratura, amás del Xacobéu. A estos hai que sumar el circuitu Autores nel Camín, entamáu pola Dirección Xeneral de Política Llingüística y protagonizáu polos ganadores de los premios en llingua asturiana.

Les característiques de cada circuitu detállense de siguío:

•  Circuitu Xacobéu. 14 proyectos de doce artistes, profesionales y empreses asturianes que se van programar en 18 conceyos hasta final d’añu. Cultura destina 55.676 euros a esta iniciativa.
• Circuitu d’artes escéniques. Los 38 artistes o compañíes escoyíos van presentar hasta fin d’añu 57 actividaes en 88 representaciones programaes per 40 conceyos. Cultura destina 232.164 euros a esta iniciativa.
• Circuitu de música. Los 37 artistes o grupos solicitaos por 31 conceyos van protagonizar 45 actuaciones nel segundu semestre. Cultura destina 131.736 euros a esta iniciativa.
• Circuitu de cultura tradicional. 14 compañíes van llevar 16 propuestes distintes a 27 conceyos n’otres tantes actuaciones hasta avientu. Cultura destina 48.860 euros a esta iniciativa.
• Circuitu de lliteratura. Los 27 proyectos de 21 creadores van llegar esti semestre a 30 conceyos en 54 actividaes. Cultura destina 45.957 euros a esta iniciativa
• Circuitu d’artes visuales. Los doce proyectos escoyíos na última convocatoria van esponese a partir del 1 de xineru del 2022 y la inversión en costos de producción asítiase en 100.000 euros. Pal últimu semestre d’anguaño confirmáronse siete propuestes d’otros tantos artistes, incluyíes na convocatoria anterior, que van poder vese en 12 esposiciones en 10 conceyos.
• La Cinemateca Ambulante. Ta preparándose la programación d’ochobre a avientu, con una inversión pal últimu trimestre del añu de 23.768 euros.
• Circuito Autores nel Camín. Protagonizáu por escritores y artistes ganadores de los premios lliterarios en llingua asturiana que convoca la Conseyería de Cultura de les convocatories del 2019 y el 2020, amás de dos autores n’eonaviegu. Quince creadores y artistes ufierten 46 actividaes en 19 conceyos hasta avientu. Esti circuitu, financiáu dafechu pol Principáu, tien un presupuestu anual de 37.270 euros.

Descargar programación del circuitu del Xacobéu.