LA LÍNEA, la evolución, la expansión

Autor: Roberto Lorenzo (Rob Loren)

Disciplina: Videoinstalación

Descripción:

L’artista uviedín Roberto Lorenzo presenta una instalación física -con llinies de colores que xeneren una maya- y visual -cola proyección de videu o lluz sobre esta rede- que representa la espansión de formes nueves d’espresión artística, creando una atmósfera esperiencial impactante y mui estimulante pal espectador.

Esti trabayu analiza dellos de los cambeos que se producieron na esfera del arte, impulsaos pola aplicación de procesos y ferramientes rellacionaos coles tecnoloxíes nueves, la rede, l’ordenador y los sos sistemes dixitales. Más concretamente, interésase poles formes de creación, conceptos y práctiques rellacionaos sobre manera col videoarte y con dellos resultaos formales averaos a la instalación.

Roberto Lorenzo (Rob Loren) ye director artísticu del Festival Visiónica. Ye un artista de gran capacidá híbrida creativa, investigador de pensamientu creativu que trabaya en proyectos de diseñu gráficu, fotografía y videocreación, aportando la so estética y estilu a la cultura de club y la música electrónica más contemporánea. Actualmente diseña videomappings como’l proyectáu na Real Basílica de Cuadonga n’Asturies pa conmemorar los trés centenarios que confluyeron en Cuadonga nel 2018.