Arrebatados (un ensayo fílmico en tiempos de confinamiento)

Autor: Carlos Navarro

Disciplina: Cine

Descripción:

Na so obra maestra Arrebato, el creador Iván Zulueta reflexonaba sobre’l poder del cine, sobre la so capacidá adictiva, sobre la so capacidá p’arrebatanos, fagocitanos y confinanos nun fotograma. Cuarenta años más tarde, un virus llogró lo mesmo d’una forma menos poética, anque quiciás d’una manera igual de brutal. Zarraos agora en casa, confinaos na soledá y la incomunicación, la propuesta Arrebatados transita pel rexistru de la vida d’un náufragu a partir de los oxetos vinculaos col cine y les artes audiovisuales que residen na so casa de manera natural. Oxetos que munches veces pasen desapercibíos, pero qu’agora puen adoptar una significación mayor.

Carlos Navarro ye llicenciáu en Ciencies Económiques pero, depués d’unos cursos de cinematografía impartíos pola Universidá d’Uviéu, orienta la so carrera profesional al audiovisual, especializándose en formatos pa televisión y en proyectos cinematográficos, ensin dexar los sos oríxenes nel videu musical y la publicidá.

Ente los sos últimos trabayos destaquen Cuca (retrato de una mujer), premiu al meyor llargumetraxe asturianu nel Festival Internacional de Cine de Xixón, y el proyectu que, baxo’l títulu Asturias Sonora, engloba 10 videoclips d’otros tantos artistes asturianos en sitios icónicos de la nuestra xeografía. Realizó video-creaciones pa ópera, y produció y dirixó más d’una decena de curtiumetraxes que recibieron más de venti premios nacionales y internacionales.