La banda británica Jethro Tull irrumpió nos años 60 con un soníu nuevu y arrollador que supunxo un impactu global bien grande.

Ente 1971 y 1975 editaron una riestra d´álbumes que güei siguen siendo obres maestres de la música popular: Aqualung, Thick as a brick, Living in the past, A passion play, Minstrel in the gallery… Jethro Tull caltienen anguaño l´actividá y el nivel de producción de siempre con una calidá orixinal intacta. Ian Anderson, líder, compositor y front man de Jethro Tull, una de les formaciones más durables, icóniques y influyentes de la historia del rock progresivu, conserva tol magnetismu n´escena, y la so flauta tan característica y la so voz son la marca d´identidá de la banda.

En conciertu Jethro Tull repasen con contundencia esquisita cuasi tolos sos grandes éxitos y, amás, presenten dalgunos temes de The zealot gene (2022) y RökFlöte (2023), los sos últimos trabayos d´estudiu dende 1999.

La vuelta de Jethro Tull, con una xira anunciada a últimos del 2019 y tarazada pola pandemia, concretóse nel 2022 cola edición de The zealot gene, primer discu con material nuevo dende J-Tull dot com, de 1999, y la xira mundial siguiente. Yá n´abril del 2023 apaeció RökFlöte, álbum que rellaciona la mitoloxía nórdica col nuestru presente y qu´empieza con un spoken word de la islandesa Unnur Birna Björnsdóttir, qu´introduz una docena de cantares de rock definíos pola voz d´Anderson, les guitarres y les flautes marca de la casa.