Nel Líbano nun me consideraben libanés abondo porque yera d’orixe armeniu. Los armenios nun me consideraben armeniu abondo porque naciere nel Líbano. Cuando asitié n’Europa nun me consideraben européu porque nun naciere n´Europa. Llevóme años tar en paz conmigo polo que soi y aceptar ser l´eternu intrusu y abrazar la riqueza de la mio identidá multicultural.

Esta esperiencia reflexóse tamién na mio rellación cola música. En cada conciertu, al interpretar obres de Bach o Mozart, o al improvisar n´estilos tan diversos como´l jazz, el gipsy, el flamencu o´l tangu, la sensación de ser un intrusu medraba. Cada nota resonaba cola señardá d´una casa que nun existía, un sitiu onde nun acababa d´encaxar.

Sicasí, esta condición de intrusu diome la oportunidá d´esplorar y disfrutar de músiques y cultures fascinantes, ayenes a la mio propia tradición.

La mio idea nun yera afaceme a estos estilos, sinón da-yos la mio propia voz, la voz del mio violín y la mio visión única de la música, ensin disculpame por ser diferente. En cada nota, en cada improvisación, buscaba tresmitir la riqueza de la mio esperiencia multicultural, fusionando les tradiciones más diverses nun soníu único y personal.