Astyanax / Manifiesto sobre la aniquilación ye una traxedia sobre los derrotaos nes guerres de la vida, y el despreciu a los artistes.
¿Qué va facer l´home cuando reduzan la belleza, la cultura, la compasión y la bondá a la nada? ¿Va sobrevivir? Cada día que pasa esmucímonos per una cuesta que va dar nun sitiu ensin guapura, onde la cultura y los artistes son perseguíos, censuraos o ignoraos.

Un mundu violentu enllenu de xente vulgar, confundío, solo y malo que s´avezó a lo feo y al terror de lo inhumano, esto ye, a ellos mesmos. Detrás de cada monstruu, de cada instagramer descuartizador, de cada tiranu, de cada guerra, de cada violador, tamién hai una muyer al so llau que lu protexe mentes sorrí... Defensores de lo inxusto. ¿Quién va salvanos del home si la muyer sorrí?

Paez que toos desearen el mesmu destín; la estinción o, nel so casu, l´esterminiu; como si buscaren un suicidiu en comunidá, guerra tres de guerra. Un bombardéu más, un bombardéu solu y salvábemos al ser humanu d´él mesmu.

Pero, tranquilos, hai motivos pa la esperanza, quédanos el consuelu de l´aniquilación. Un home apuñalando neños escuende´l xuxuriu de salvación.