Circuitu de narración oral

«Yera que yera una neña tan pequeña que nun yera a ver les coses con perspectiva…». D’esta manera empieza esta historia de la que firma testu y música Alicia Álvarez, cantante y guitarrista de Pauline en la Playa. Una historia ilustrada por Alicia Varela na que Pulgarina, una protagonista diminuta y ablayada pol so tamañu, entama un viaxe de descubrimientu personal onde nada ye lo que paez sinón namás una cuestión de perspectiva.

Na so puesta n’escena, l’autora canta y cunta con voz y guitarra esti rellatu fabulosu, acompañada pola proyección de les imáxenes del cuentu y cola compañía nel escenariu del multinstrumentista David Varela, quien col so acordión diatónicu, percusiones y un serruchu tocáu con arcu afonda xunto a l’autora nesta emocionante llectura musicada enllena de metáfores, simbolismos y poesía doméstica pa tolos públicos.