La Conseyería de Cultura entamó un ciclu de conferencies sobre’l Monesteriu de San Salvador de Corniana nel marcu de los actos conmemorativos que se celebren pola mor del so milenariu (1024-2024). Estes ponencies van valir de preludiu a la llegada, el 16 de payares, del acta fundacional del cenobiu, un documentu que lleva fuera d’Asturies más de 200 años y que va volver pa esponese a lo llargo d’una selmana gracies a la collaboración ente’l Ministeriu de Cultura y el Principáu. El manuscritu va poder visitase’l sábadu 16 de payares nel mesmu monesteriu, y hasta’l vienres 22 nel Archivu Históricu d’Asturies, n’Uviéu.

Coles conferencies divulgatives sobre esta construcción y la documentación y el patrimoniu cultural xeneraos nestos mil años d’historia monástica, la conseyería pon en valor ún de los cenobios más relevantes del territoriu asturianu.

Col títulu El Monesteriu de Corniana a la lluz de la so güelga arqueolóxica, cinco especialistes van analizar aspectos que van dende los antecedentes arqueolóxicos del territoriu onde se llevanta hasta la evolución constructiva del edificiu, pasando pela so dotación mueble y la producción documental surdida del so scriptorium.

El Muséu Arqueolóxicu d’Asturies, organismu dependiente de Cultura, iguó’l programa de les conferencies que se van celebrar d’alcuerdu con esti cronograma:

• Vienres 27 de setiembre, 19:00 hores

Entre la villa de Cornelio y Beriso. Cornellana en el umbral de la Historia. Por Ángel Villa Valdés, arqueólogu del Muséu Arqueolóxicu d’Asturies.

• Vienres 11 d’ochobre, 19:00 hores

Documentos para la historia del monasterio de Cornellana: de la dotación a la dependencia de Cluny. Por Miguel Calleja Puerta, profesor titular de Paleografía y Diplomática de la Universidá d’Uviéu.

• Vienres 25 d’ochobre, 19:00 hores

La evolución constructiva del monasterio de San Salvador de Corniana/Cornellana a partir del análisis arqueológico de su arquitectura. Por Alejandro García Álvarez-Busto, profesor titular d’Arqueoloxía de la Universidá d’Uviéu.

• Vienres 8 de payares, 19:00 hores

Dotación mobiliaria del monasterio de San Salvador de Corniana/Cornellana en la Edad Moderna. Por Alberto Fernández Suárez, técnicu especialista en Patrimoniu Cultural.

• Vienres 22 de payares, 19:00 hores

Entre libros, pergaminos y papeles del monasterio de Corniana/Cornellana. Por Clara Elena Prieto Entrialgo, profesora ayudante doctora del Departamentu de Filoloxía Española de la Universidá d’Uviéu.