Circuitu de música

Stabat Mater ye la historia d’una muyer que quier aprender a ser llibre y querese más de lo que naide lo va facer enxamás. La busca empieza col so nacimientu... y Stabat Mater empieza cola so busca.

Conciertu llíricu onde la palabra garra importancia absoluta. Narra la vida d’una muyer que llucha pol derechu a ser ella mesma y recuperar una vida marcada por un padre ausente y una busca de verdá.

El guión dramatizáu constrúyese, como los pegollos de la narración, de fragmentos de testos y poesíes de muyeres que llucharon tamién pol derechu a desenvolvese: Rosalía de Castro, Christine de Pizan, Xosefa de Xovellanos... y d’un testu de José Busto, dramaturgu asturianu, que plasma los últimos instantes de Sarah Kane. Los cantares, escoyíos a costafecha, van ser los que faigan que’l factor emocional caltrie no más fondo del públicu, pa conformar una historia de llucha y superación.