Circuitu d´artes escéniques

La tristura, esi efectu colateral del coitu, ye’l motor d’esti espectáculu. Dos actrices y dos actores desdoblaos en dellos de personaxes naguando por querer, baillar y besar la vida. Teatru baxo los rayos del sol, testosterona en movimientu, alcuentros y desalcuentros nuna comedia alloquecida que retrata cualquier branu de la nuestra vida.

El branu ye un estáu de la mente. A más hores de sol y más vitamina D, más niveles de serotonina. La estación estimula la secreción de la famosa “hormona de la felicidá” y al empar desata un argayu de deseos y suaños que producen escenes de risón. Más lligues, menos ropa, comienzos, cuernos, ruptures, fases más o menos promiscues... Depués de llegar al cénit del placer sexual, un regueru hormonal converxe llibremente nel organismu xenerando cierta sensación de bienestar. Pero como tolo que xube de manera acelerada ha de cayer de la mesma forma, surde la tristura. La tristura, l’angustia y l’ansiedá son los síntomes que, en xeneral, esperimenten delles persones depués de facer l’amor. N’acabando l’actu, dalgún de los dos protagonistes llora. Y acullá de la ‘disforia poscoital’ nesta comedia asoma la parte más reflexiva y humorística de la rellación abrupta, del idílicu romance o del “equí te pillo, equí te lloro”.

Los polvos melancólicos: la obra teatral onde “la joie de vivre” y el placer de les coses pequeñes conviven de manera cómica cola frustración del amor ideal, los desarreglos mentales y el “frescor estival”. Un espectáculu pa bronciate per dientro, rir y reflexonar.