Embaxo MASTODONTE atópase´l proyectu musical d´Asier Etxeandia y Enrico Barbaro. Una propuesta que naz nel 2018 pa revolucionar el panorama musical tal y como lu conocíemos, engalanada colo meyor de dambos artistes: al calter poliédricu del artista bilbaín súmase la pulcritú y el saber facer del multiinstrumentista italianu.

Y asina lo mostraron nel so álbum debut homónimu. Un trabayu que, más qu´un discu, ye toa una esperiencia sensorial; una esplosión d´emociones espresaes al través de la música.

Ye un viaxe emocional, como lanatomía d´una vida, coles sos etapes, actos que conformen los sos cantares, épicos y rotundos. Una aventura conceptual al traviés de la vivencia d´un ser humanu, dende una vida anterior al so nacimientu, pasando pela infancia, adolescencia, el descubrimientu de la pasión y l´amor, la madurez, la perda, el perdón y la muerte y aceptación serena de los sos errores.

Mastodonte ye un conceptu, ye la materialización imaxinaria d´un ente enorme y pesáu, dalgo colo que tol mundu aveza a cargar. Mastodonte ye´l pesu de toles inseguridaes que nun nos dexen revelar al mundu esterior les nuestres cualidaes peculiares, pol terror íntimu al xuiciu ayenu, pol mieu de nun tar al altor, pol pánicu que nos produz pensar que los demás descubran que nel fondu somos unos impostores, espliquen ellos mesmos, y añaden: Mastodontes son tamién aquellos que son quién a romper estes atadures, revelando y reivindicando la so guapura esclusiva.

Nomináu a los Latin Grammy Awards 2019 na categoría de Meyor videu musical versión llarga pol videoclip tan imponente de Anatomía de un éxodo, el MASTODONTE d´Etxeandia y Barbaro demuestra cada vez que xube a un escenariu que´l so directu nun ye un conciertu más. Ye una celebración auténtica de la vida dirixida al corazón del espectador.

La so última xira La Transfiguración del Mastodonte arrasó en sales y teatros d´España entera, llogrando´’l premiu a Meyor Espectáculu/Musical del 2019 —escoyíu pol públicu de Madrid Es Teatro—. Y agora vuelven a los escenarios con formatu nuevu: Simplemente perfecto Tour. Un set electrónicu acompañáu cola creación d´un espaciu escénicu y sonoru elegante, con una llectura actualizada de los conceptos clave conteníos nos cantares del so álbum homónimu.