Proyectu de: Laia Abril

El Centru Niemeyer acueye la muestra On Abortion, de l’artista multidisciplinar Laia Abril, onde documenta y conceptualiza los peligros y daños causaos a les muyeres pola so falta d’accesu al albuertu de forma llegal, segura y gratuita.

Entamada pol Centru Niemeyer, cola collaboración del Ministeriu d’Igualdá, trátase de la primer esposición monográfica de Laia Abril n’España desque llevó’l Premiu Nacional de Fotografía 2023.

La esposición, que recueye’l primer capítulu d’un proyectu a un plazu llargu de la fotógrafa tituláu A History of Misogyny, una investigación visual sobre la misoxinia fecha al traviés de comparances históriques y contemporánees, va poder visitase na Sala de Fotografía del Centru Niemeyer, del 22 de payares del 2024 al 2 de marzu del 2025.

N’A History of Misogyny, Laia Abril desplega una década d’investigación visual qu’examina los sistemes d’opresión de les muyeres na sociedá, mostrando la naturaleza non-llinial de les polítiques misóxines. Nel so primer capitulu, On Abortion, Laia Abril esplora les repercusiones de la falta d’accesu a un albuertu seguru, llegal y gratuitu: dende maternidaes forciaes y daños físicos y psicolóxicos hasta encarcelamientos y inclusive muertes.

Al traviés de testimonios de persecuciones y amenaces n’ámbitu clínicu, confesiones católiques y la esposición de métodos clandestinos, Abril construye una narrativa visual, testual y auditiva ellaborada con tol procuru. Esta instalación texe una rede complexa de preguntes étiques y morales que desvela cómo estos sistemes de control sobre los cuerpos de les muyeres foron, y siguen siendo, silenciaos y invisibilizaos.